Mapa tajemba akümer !

Asenok alimai aruba ya kazütsü aruba masü saka mapa inyaki aru ta tamasa angatetdi. Ibaji kodang angatetdir, asenoki asenoksasa süra kechi mapa inyaktsü (?) ta memetetika asüngdanga adoktsü. Iba telangzübaji lanurtemi kaketshisatsü bushiba ajanga ngutettsüsa bushitsü tim. Tanübo kibong nung tasor ajak kaketshidaki aoer aser akhi ama masü tazünger ajaki kaketreju nungbo takok angur. Iba jagi küm shia lanur meyirijang aika graduate asür aser mapa bushitsü tenzüker. Ajisüaka, asenok ajak tamakok kaji government-ia tazünger ajak nembo government mapa magütsütetter aser tezüngtettertemia peisasa mapa tasen bushia metenzüktetter. Iba jagi asenok kaketshisatsü bushiba yabo asenoki mapa tasen ka bushiteta tenzüka inyaktsüba masü saka züngzükli kari ita sen chia alitsüsa mapa terenem ka bener arua agütsütsü amai imlaa azünger. Ibayongji, tazünger ajaki government mapa inyaktsü asoshi azüng amai bilemer, anungji government mapa bushir. Ajisüaka, alima nung inyaktsüba mapatemji government mapa dangbo masü saka government mapatem dang nungi tuluba aser tajungba inyaktsüsa alima nung mapa inyaker meinyakba yuja lir. Shitakba bilemdangra, government mapa nung anogo shia kasa office-i oli aruli ta inyaktsübaji talaktsüka aser tepuokdak puoka yur mapa inyakdaktsüba den kasa lir. Iba jagi government mapa inyakertem dak aketba tashi aser sempet noklang nung ter shilema mamshiteti leper atonger. Akhidang, state kümli goverment mapa aika aser teinyaker ajemra ta aliba mapang government mapai aitsübaji kanga tenüngdaktsü liasü saka tanübo government mapatema ajema akümba dak alaka inyaker aikabo menüngdaker. Joko, akhidang office mapa nisung asemi temeyong agi sükdanga ongko inyaka alibato tangbo computeri dang inyaker asünungji nisung kata menüngdaker. Iba amaji akhidangbo süng tsüka süngo moluba to tanübo light tashi nung molur, akhidang tzübo nungi tzü taa teben agi sü shidokba to tanübo machine agi inyaker, akhidang nisungtemi anükba mapatem ajak to computeri dang inyaker asünungji joko office anüktsüa menüngdak akümer. Iba amaji akhidang nisung noklangka agi inyakba mapato tanübo nisung anati machine amshia inyaker asünungji nisung teka agi inyaktsüba mapabo tajemba-tajemba küma odagi. Iba ama putu ka nung nisung shiai kechi mapa inyak nung ajungtsü ta bilemdanga pei lima aser nübortem asoshi nüngdakba mapa reprangteta peisasa mapa tasen bushiteta inyaktsübaji kanga tenüngdaktsü kümogo. Ajisüaka, ano tajung kaji, alima nung mapa inyaktsü tajemba-tajemba kümaka nütsüngbo teimba teimba akümer aser nütsüng teimba akümba amaji chiyongtsü teimba aser tuluba nüngdaktsü, kiojen teimba nüngdaktsü, abensüoshi teimba nüngdaktsü aser senzüsenpongba mapatem tali tali kümadoktsü. Item ajak nungji mapa keta lir. Anungji, tang aser tarutsü putu ya shirnoki item nüngdaktemji reprangteta mapa tenzükdir, alima rongsenji parnok meyong asütsü. Iba ama tensa ya akhi ama masü saka tanübo shirnoki government mapa dak dang rangloker kaketshisatsü bushir parnok aika tezüdangadoktsü, kechiyong aikati government mapa mengutettsü aser anguyonga jangratema inyaktsüsa masütsü. Tanü lima yabo private teloktemi government den toktepa inyakba lima ka kümadokogo. Joko, gari lenmanga private teloki dang yanglur aser iba nung jagi parnok alimelen (toll tax) agir, light-a private telok nungi dang goverbment-i alitsüsa akümer. Aji oda, government mapabo police aser obendangertem ayutsüba mapa dang küma odagi. Iba ama putu melentepba yimyatem asenokia reprangteta asenok nisung shiai alima nung akaba rongsen aser nübortem nüngdak reprangteta asenoka teyanglur aser tagütsür kaka küma alitsüsa merangtsüla. Tuluka mesüra tilaka ta kecha mali saka asenoki asenoksasa inyaktetba langka agibosa nübortem nüngdak tongtsütsüla.