Taoba sorkartemi tamarener ama yimsü süogo: PM Narendra Modi

Balangir (Odisha), January 16 (Agencies): Ita ka tsüngda Odisha nung lokti senden asem tashi nung jembidang Ato kilonser, Narendra Modi-i Centre nung taoba sorkartem aija jembi.
Balangir district kübok Patharchepa yimdak BJP rally nung jembidang Modi-i, taoba mapang sorkartemi tamarener chubatemi yimsü asüba ama linük yimsü süa aruogo; parnoki linük takar sobaliba mezüngshi, ta metetdaktsü.
“India ya alima nung sobaliba nung lenir masü no? Asenok civilization ya terenloktiba masü no? Iba konang asentenshitsü atema asenoki inyaktsüla masü no?” ta Modi-i asüngdang.
“Alimai nükshibatemji bendangertemi raksatsü, ajisüaka ibaji asentenshitsü atema taoba sorkartemi mebilem, parnoki tamarener chuba amai yimsü süogo. Parnoki chuba yimli yangertsü atema meranger,” ta pai ashi.
Ita ka tsüngda Modi-i tang agi asembenbuba Odisha semdangdang sen crore 1500 jenjang terenlok projects tenzüktsü. Pai December 24 nü Khurda aser January 5 nü Baripada semdanga liasü.
Modi-isa, tamangba yimsü tsütsü nüngshi kiojentem asentenshitsü atema sorkari inyaktsü, koba ajanga konang asentenshitsü, ta ashi.
Opposition lenirtemi teloktep yangluba dak sendakba nung pai, “Modi agientsü atema asalentong yanglur. Modi agientsü atema parnok longjemer. Ajisüaka ni Jagannath tsüngrem aliba li nung ya azüngashir, sensakertem dang nungi sen auyartemji chowkidaar (ni) nokdangtsü. Chowkidaar-i parnok nem temerenshi agutsütsü,” ta ashi.
Modi-isa, “Ozü sorkari terenlok lenla pongu atema inyaker- tanur ajak nem shisaliok, lanurtem sen aazüktsü, taintem asoshi mozü, aluyimertem atema irrigation projects aser nüburtemi ashiba angaba,” ta metetdaktsü.
2016 küm Centre-i Mines and Minerals (Development and Regulation) Act yanglushiogo aser Odisha-i sen crore 4,000 nguogo, ta shia Modi-i, “Iba sen ya nüburtem, tribals atema lir aser mines tesem terenlok atema lir. Ajisüaka sorkari sen ishika dang indok. Item senji mamshii yua lir,” ta metetdaktsü.