Central university 13 amenoktsü atema Cabinet-i agizükogo

New Delhi, January 16 (Agencies): Sen crore 3,600 indoka taruba ita 36 tsüngda Central University 13 amenoktsü atema tanü Union Cabinet-i agizükogo.
Central universities tasenji Central Universities Act, 2009 kübok Bihar, Gujarat, Haryana, Himachal Pradesh, Jammu & Kashmir, Jharkhand, Karnataka, Kerala, Orissa, Punjab, Rajasthan aser Tamil Nadu nung amenoktsü. Item state shia nung university kaka amenoktsü, ajisüaka Jammu & Kashmir nungbo ana amenoktsü.
Osangbenertem senden ka nung jembidang Union Minister, Piyush Goyal-i, “Central University tasen 13 amenoktsü, infrastructure aser campus atema sen crore 3,639.32 agutsütsü Cabinet-i agizükogo. Item mapaji taruba ita 36 nung renemtsü,” ta metetdaktsü.
“Cabinet-isa iba sülen crore 1,474.65 agutsütsü aser tamalen Cabinet-ia iba atemaji sen crore 3,000 agutsütsü agizüka liasü,” ta paisa shisem.
Minister-isa, ibaji ajanga temaba shisaliok jenjang tajungba akumtsü, aser tanga universities atema tatishitsü asüba dang masü saka linük tesem balala nung shisaliok rejutem liromedema kümdaktsütsü, ta metetdaktsü.