Bhogali Bihu nung Assam CM dang balloon tanak sayu ; Sonowal-i nübortem mashioktsütsü nangzüker

Guwahati, January 16 (Agencies): Northeast India nung Citizenship Amendment Bill 2016 anema lungkak aitba mapang ka Assam Chief Minister Sarbananda Sonowal dang mepelaba sayuogo.
Assam kübok Nagaon district nung Mongulbarnü Sonowal Bhogali Bihu benjung nung adentsü atema ao saka idangji Asom Jatiyatabadi Yuba Chatra Parishad (AJYCP) züngsemtemi pa anema balloon tanak yok.
Hombarnüa par constituency Majuli nung nisungtemi Sonowal anema lungkak ait.
Lungkak aitertemi Sonowal aser Bill anema yimyim ayim aser idangji police-i nisung 4 apu.
Tanü Dhubri nung sentong ka nung jembidang, “ni ya Assam nung alirtemi temulung lemteta aser tamang kaa Chief Minister kümdaktsü aser ni mashioktsütsü” ta Assam Chief Minister Sarbananda Sonowal-i ashi.
“Assam nung alirtemi ni chief minister kümdaktsü. Ni Assamese nunger ashioktsütsü atema aruba masü. Ni tatem tashi Assam renloktsü atema inyaktsü” ta pai ashi.
“Onoki dang Assamese nunger kümzüka ayutsü. Taoba mapang ni sorkar aika nguogo. Ni Chief Minister inyaktsü atema dang iba mapa inyakerba masü. Dr. Bhupen Hazarika aser Hemanga Biswas nunger tangatetba sülen anidaka ni Assam nung yimjung bener arutsü atema inyaker” ta Sonowal-isa metetdaktsü.
Citizenship (Amendment) Bill 2016 atema Assam nung BJP sorkar MLA tsüngda obang meputep adoka lir. Rituparna Baruah, Padma Hazarika aser Atul Bora nungertemi yimjak nung Bill anema jembiogo.
Assam nung BJP-i aniba teloktep sorkar nung Asom Gana Parishad (AGP) dena liasü saka January 7 nü parnoki Bill anema BJP den tesentaktep pila.
BJP den tesentaktep pilaba sülen regional political party AGP-i January 18 nungi Citizenship (Amendment) Bill 2016 anema sentongtem agitsüba osang metetdaktsüogo.