Osangkaket adokertemi sorkar advertisement sen meshir

Dimapur, Sept.10 (TYO) : Nagaland sorkar meyong advertisement osangkakettem nung adokba indang sen magütsüba agi yimozülurtemi iba senji meshia züluba shidi ka Chief Secretary nem tanü Brehostibar nü agütsüogo.
Shitakba agibo, osangkaket nung sorkar meyong advertisement adokba sülen anogo 45 tsüngda iba senji agütsütsüla, ajisüaka yaküm 2014 küm October ita nungibo state sorkar indang advertisement adokba sen magütsür, ibaji sokari inyaktsü nangzükba o mapa küma meinyakba tamakok ka asütsü ta yimozülurtemisa metetdaktsü.
Nagaland sorkari lemtetba ama, state kübok department ajak Information & Public Relation Directorate ajanga dang osangkakettem nem advertisement agütsütsüla aser item advertisement adoker anogo 45 tsüngda iba senji agütsütsüla ta yimozülurtemi Chief secretary dangi züluba shidi nung nenshia metetdaktsüogo.
Chief Secretary dangi zülurtemji Nagaland Post yimozülur, Geoffery Yaden, Nagaland page yimozülur Monalisa Changkija, Eastern Mirror yimozülur Witoubou Newmai, Morung Express yimozülur Aküm Longchari aser Tir Yimyim yimozülur K.Temjen Jamir nungertem liasü.