Supreme Court judge 2 shimba atema ashishiteper

New Delhi, January 16 (Agencies): Bodbarnü Centre sorkari Karnataka high court chief justice Dinesh Maheswari aser Delhi high court judge Sanjiv Khanna na Supreme Court nung judge inyaktsü ajungketer, ta Ministry of Law and Justice-i metetdaktsü.
January 10, 2019 nü Supreme Court Collegium tena menden ajungkettsü junger ta oshidang agütsü. Ajisüaka, iba telemtetba atema ashishiteptsü tenzük kechiyong Collegium-i December 12, 2018 nü Rajasthan nung Chief Justice, Justice Pradeep Nandrajog aser Delhi High Court nung Chief Justice, Justice Rajendra Menon na menden ajungkettsü atema telemtetba agia liasü.
Supreme Court Collegium-i ashiba ama President Ram Nath Kovind-ia mulunga agizük aser iba sülen tena menden ajungkettsü indang tetuyuba agütsü.
Chief Justice Ranjan Gogoi-i aniba Supreme Court collegium-i judge ana ajungkettsüba telemtetba agiba osang sangoktsüba sülen Delhi high court nung taoba judge justice Kailash Gambhir-i iba telemtetba anema mezüng jembi.
Iba ya Indian judiciary atema tammang anogo ka lir ta Gambhir-i aser paisa President Kovind-i mulunga agizükba meyipa agitsü atema mepishi.
“Putiotsü nung aibelen ka ano teinyak” ta Gambhir-isa metetdaktsüogo.
President Kovind-i mulunga magizük tsüngda Bar Council of India (BCI)-ia Supreme Court collegium dang January 10 nü Justice Khanna aser Justice Maheshwari menden ajungkettsü lemtetba meyipa agiang ta tayongzükba ka agütsü.
Linük nung legal fraternity nung telok kati Justice Maheshwari aser Justice Khanna na SC nung judge inyaktsü menden ajungketbaji tim masü kechiyong iba ajanga senior judge aika madak tena ajungketer ta ashir.