6 buba Longpok Semchir mungdang takok ngua tembangogo

Mokokchung, JAN 16 (TYO): Trok buba Longpok Semchir Telungjem mungdang Jan 15 aser 16 anogo ananü yangi Mokokchung town hall nung “terajem mongjen” omen dak rangloker takok ngua mungogo.
Jan 16 nü Higher & Technical Education Minister, Temjen Imna Along Longkumer-i jembidang, asen sobaliba aser bendanger sobaliba na benjatepba ajanga lanurtem aika mangmangteper, mekümdangra asen sobaliba ya samaa aotsü ana nung lir, ta ashi.
Alima dang asen senmang sayutsübaji asen maitsü/ayak (identity) ya dang, anungji, asen teraji mamatoki wazüka ayutsü asoshi tsüraburtemi pei chirnurtem dang tim sobaliba sayutsü nungdaker, ta paisa ajungshia liasü.
Paisa Ao oshi dak sentakba nung tebilemtsü kar shioktsüdang, tanü lanurtemi Ao oshi aikati mejembiteter, bendanger oshi aika jembitetaka, pei tetsü oshi meshira aser mejembitetra temoatsü aika mungutettsü, ta ashi.
Lanur aika kaket shisatsübo tulu lir saka sobalibabo mangatet, anungji, akok tashi pei sobaliba aser teraji retreta agizüka angazüktsü merangtsüla, ta paisa lanurtem dang inyakdaktsünüba olen ka ashi.
Alima tejakleni aotsü atema pei chirnur nem education tajung agütsüba den Tsüngrem akhümtsübua aser mapa meranga inyaktsü asoshi paisa mungdanger ayongzüka liasü.
Sentong nung “terajem mongjen” nung ajemdaker tsürabur Longrikaba-i tagitsü onük tajung aika bener arua mungdangsangertem den lemsatep. Ex. MLA & Senior Advocate Taka Masa Longkumer aser Longjakrep Semchir Mungdang tir Imolemba natia shilem agia tepela o tatsütsü jembi. Mokokchung town nung aliba Ilangtsürtemi sentong lemsadakja sobaliba ken tajung ka aten.
Taruba kümsük asoshi Longpok Semchir Telungjem ketdangpur tasen itemi; President- K. Nokmarenba (Longsa), Vice President – Neken (Longjang), general secretary – Imkongnungba (Merangkong) aser Asst. General Secretary – Bendangwapang (Waromung) shimogo.