Yimchungru nunger Tsungkamneo benjung amung

Bodbarnü DDSC stadium, Dimapur nung Tsungkamneo benjung amungdang Yimchungru tetsürtemi sobaliba shilem ka agiba noksa nung angur.

Dimapur, January 16 (TYO): Bodbarnü Yimchungrü Union Dimapur (YUD)-i DDSC stadium, Dimapur nung Yimchungru nung benjung tongti ‘Tsungkamneo’ ayongzüka mungogo.
Iba sentong nung Dimapur Deputy Commissioner, Kevekha Kevin Zehol-i o jembidang “asen sobaliba kümzüka ayutsübaji kanga tongtipang” ta ashi aser paisa Yimchungru nunger dang asen oboula nunger dang nungi senmang amangba sobaliba nung ammettsü ayongzük.
Kiphire nung Fakim Wildlife Sanctuary ya arem shiruru aika alidak tesem ka lir. Asenoki iba Sanctuary ya wazüka meyura samatsü anungji Yimchungru nungertemi iba arem nung shiruru aser süngdong-lidongtem kümzüka ayutsü atema ayongzüker, ta Zehol-isa ashi.
NEC Energy Pvt. Ltd Director, Sapu Bhattacharyya-ia o jembidang, benjungya yimjung aser putepshiba mapang ka lir aser iba tangatetba nung Yimchungru nungertemi Naga nunger ajak longjemtsü atema shilem agitsü ayongzüker, ta ashi.
Sentong nungsa Western Sumi Hoho judicial secretary Hekhevi Achumi; Naga Council Dimapur president, T Bangerloba Longkumer; Yimchungrü Tribal Council vice president Kiumuhean aser taoba MLA R Tohanba nungertemia o jembi.