Opposition teloktep ya nübur anema lir: PM Modi

New Delhi, January 19 (Agencies): Tanü West Bengal nung Trinamool Congress-i ayongzükba lokti senden nung opposition party balala nung lenirtem aika adenshia adenba mapang nung Gujarat nung Ato kilonser, Narendra Modi-i, opposition loktepbaji BJP anema dang masü saka India nüburtem anema lir, ta ashi.
Tanü Gujarat nung arrtsülen aliba jila, Silvassa nung lokti den jembidang Ato kilonser Modi-i, West Bengal chief minister Mamata Banerjee-i aniba lokti sendenji- India dang nungi auyatsü aliba nungi pai nokdangertem adenshiba lir, ta ashi.
“Congress aija arurtemi tangbo longjemogo. Iba teloktep ya Bharatiya Janata Party (BJP) kija anema masü saka India nüburtem anema lir. Parnok ajak sabang ka nungbo menokdak ajisüaka asalentong atema jembishinü maparen tenzükogo,” ta pai ashi.
Modi-i, tetsür aser teburtem aser tang mezüng vote agutsütsüpurtemi opposition lenirtemji reprangdar, aser parnoki chichiba raraji ngudar, ta ashi.
“Iba rara ya tajung tebilemba aser tamajung tebilemba na tsüngda rara lir. Iba rara ya terenlok aser ochimashi na tsüngda rara lir,” ta Ato kilonserisa ashi.
“Parnok jashibaji tim dang, kechiyong parnoki linük dang nungi auyatsü aliba ni nokdang. Yamaji tangbo parnoki ‘mahagathbandhan’ ta ajaba teloktep ka tentetogo,” ta paisa shisem.