Kenya nung private security nem prangpong agütsütsü

Nairobi, Aenjeti/January 19 (Agencies): Mongolbarnü luxury hotel ka aser office complex amakba sülen Kenya-i, nübutem kanga bulua adenshiba tesem anüker private security officer tem nem prangbong hadir amoktsütsü sangdongogo.
Mongulbarnü atalokba lendong nung nisung 21 süogo, koba al-Qaeda den sendaka aliba aser Somalia nung amedaker aliba al-Shabab teloki inyaka ta nangzükogo.
Armed contractor temi nisungtem kanga bulua adenshiba tesemtem anüktsü, ta Private Security Regulatory Authority, director general Fazul Mahamed-i ashi.
Mongulbarnü Nairobi nung Dusit hotel amakba mapang asür rongnung security guard ana densema liasü.
Private security company shirnoki sorkar dang mapang talangka nungi parnok nem prangpong amshidaktsütsü khanga aruogo, parnoki iba telemtetba pelashishia agizükogo.
“Tangbo onok kümzüka lirama bilemer. Iba ya onoki mapang talangka nungi khanga aruogo,” ta Ismax Security, managing director, Abdirahman Mohamed-i ashi.
“Taoba mapangtem nungbo lendong atalokba mapang onoki police ajatsüsa aküm, koba mapang talanglang agia liasü,” ta pai ashi.
Ajisüaka iba telemtetba agiba ya Security experts temibo tebilemtsü kaa bilemba lemsatepogo.
Sorkar sangdong ajangasa ashiba agi, security guard tem ya prangpong amshitsü atema ita trok tashi training agitsü aser iba sülenang prangpong amoktsütsü.
Al-Shabab puri Dusit hotel complex amakba ya Kenya yimtiba nung tang mezüngbuba atalokba maparen ka masü.
2013 küma September ita al-Shabab puri Westgate shopping mall amak aser iba mapang nung nisung 65 tashi süa liasü.