Tai nangzükba

Tsüngrem den tesendaktep raksar aliba yanglushitsüba lenmangji tai nangzükba ya lir. Atangji, Tsüngrem den dang masü saka asenok rongnunga tesendaktep aser telongjem raksar aliba yanglushitettsüba lenmangji tai nangzükba ya asütsü. Tsüngrem dang aseni menaba tai nangzüktsüba yabo tenangzükner nangzüktsü aser menangzükner menangzüktsü ta masü saka kechisüdirsüaka nangzüktsüla. Iba jagiang, Yakob tapu 5 tekong 16 nung Tsüngrem dang dang masü saka asenok memdemertem rongnunga kati ka tsüngdang pei temenen nangzüktsü aser medemeri medemer asoshi sarasademtsütsü nüngdakba indang ashir. Iba kasa Laishiba nung shia alibaji jungjunga asenoki züngdanga bilemdangra, asenok shirangba ya karbo aseni menaba temenen agi shiranger ta angatetter, anungji kodang aseni aibelenba temenenji tangar tsüngdang nangzükdir, idangji asenok anepadoker. Ibaji tesüngmangtsüka lir. Asenoki tangar anema tai menaba asütsüa akok mesüra Tsüngrem anema menaba tai asütsüa akok, kodang asenoki item temenentemji odia nangzükdir, idangji asenok tepuokdak puoka aliba nungi chioker amai nüchi küma aruba tepela aser tashiji kanga tulu asütsü. Atangji, asenoki asen tai nangzükbaji tema tazütsü agi masü saka ochi mulung agi sasaseta nangzükba mapa ka asütsüla. Asenoki aiben Tsüngrem dang sarasadem dang temenenbo nangzüka sarasademer saka kodang kechi temenen menaba asoshi tai nangzüka sarasademar mejangjaika sarasademer. “Oh, Kibuba kü temenenba taküm dang tai tokang,” ta sarasadembaji tapu ka, iba sarasadem nungji koba tai aser temenen indang ashiar mejangjar saka temulung raksaa kechi tai aser kodang mena, iba temenenji asensasa tuteta Tsüngrem tsüngdang yuja tai nangzükbajiang shitakba tai nangzükba sarasademji asütsü. Iba kasaji asenoki nisung anema inyakba taitema nisung tsüngdang jangjajangjaa nangzüktsüla. Tai nangzüktsüba mapa ya tangari menaba tai nangzüktsütsüba masü saka asenoki asensasa menaba tai nangzüktsüba indang ashir. Asenok karibo tai nangzükbaji tasümait mapa ta bilema alitsüa akok saka tai nangzükbaji tasütaiter mapa aser pei taküm nung temeneni yimsü mesüdaktsünüba kuli mapa agi sayur. Yakob-i sarasademba o tai nangzükba na ya mapa ka dang ta angatetdaktsüner, anungji asenoki temulung ajak agi asen tai menangzükra, asen sarasadem agi Tsüngrem matongtsü. Asen tai jangjajangjaa nangzüka sarasadembaji Tsüngrem den ajuruteptsü lenmang lapokba jabi lir. Kasa Yakob tapu aser tekong nungji “temeshi nisungi sarasademba nung tajangzük tulu lir,” ta shia angur. Tetezü, kodang asenoki asen tai ochishia nangzüker, idangji Tsüngremi asen dang tai adoker aser asenokji temeshi nisung akümer. Iba ama tensa mapang ka nung ochi mulung agi pei temenen nangzüka sarasadembaji asenok atema temoatsü lenmang lapokba mapa ka asütsü. Iba tangatetba aser tamang nung asenok tanüla nung teti tashi itta alitsü atema anogo shia asenoki menaba taitem indangindanga Tsüngrem tsüngdang nangzüka sarasademtsüla. Atangji, pei inyaknütsü inyaktsü aser tesüsa Tsüngrem aser nisung tsüngdang tai nangzüktsü ta masü saka akok tashi asenoki Tsüngrem aser nisung tsüngdang tai memenatsü merangtsüla. Ajisüaka, kodangsa memeteti aser mekokteti tai menadir, itemji ochishia nangzüktsüla. Tsüngrem aser nisung tsüngdang asenoki menaba tai ajak nangzüka endok nung dang asenok sarasademji jangratemtsüka akümtsü aser tajangzük aika angutsü. Aiben asenok dak asüküm jakla aser shisatsü aliba agi asen tai nangzüktsübaji asenoki makoker saka asenoki asensasa asen tai menangzük tashi Tsüngrem den asenok tesendaktep alitsü makoktsü. Tsüngrem pela nung dang asenok azükarutsü aser Tsüngrem peladaktsünüba mulungjangi dang pei tai nangzüktettsü aser peisasa menaba tai temenen talenba nungi salatettsü.