Lower P.R Hill Youth Organisation küm 25 Jubilee among

Kohima, January 19 (TYO): January 19, 2019 nü P.R Hill Colony, Kohima nung Lower P.R Hill Youth Organisation pur küm 25 ajungba Jubilee mongogo; iba sentong nung tetushi tejaokerji Rural Development Advisor, Dr. Nicky Kire liasü, ta ketdangsertem osang ka ajanga metetdaktsü.
Iba sentong nung jembidang Dr. Nicky Kire-i P.R Hill Youth Organisation takok tulu nung küm 25 ajungba atema akhidang lanur ketdangpurtem aser tang teinyakdakpurtem nem tenüngsang agutsü.
Paisa Village Adoption Committee, 9- Kohima Town-i mapang shidak nung tetsüng lenmang aser kilentzü aodak yangluba atema pelaba metetdaktsü.
Pai Colony nung alirtem danga anema alitsü atema libajen merükteta ayutsü aser national highways nung tzü pipe mesangdaka ayuba ajanga jila tepor ajung raksatsür, anungji itemjia anepaludaktsüner, ta mepishia metetdaktsü.
Sentong tetenzüklen pai Lower P.R Hill Youth organisation indang Silver Jubilee nüngshilong sayatsüba den külemi Village Adoption Comittee 9- Kohima Town Assembly Constituency-i 2018-2019 küm yangluba tetsüng lenmang den kilentzü aodak semzükja liasü.
Kasa sentong nung SDO (C) Sadar Kohima aser Convener Adoption Committee, Longasen Lotha-i tang teinyakdak ketdangpurtem dang mezüngpurtemi inyakteta yutsüba mapatem wazüka ayutsü aser lanurtem atema tatishitsü tajung sayutsü ajungshia liasü.
Paisa Rural Development Advisor, Dr. Nicky-i terenlok mapatem inyaktsüba atema pelaba lemsatep.
Iba sentong ya Shurhovinuo leniba nung agi aser Lower P.R Hill Youth Organisation President, Aowapang Paul-i lokti pelaa agizükba o jembia liasü.
Kasa sentong nung Convener aser Chairman Panchayat, Ketsokhol Kennao aser taoba mapang Colony President, Kekhriezetuo Solo natia o tatsütsü jembi. Imsensuba-i ken ka aten aser General Secretary, Kevi Belho-i tepela anküp o jembia liasü.