Vikas Krishan-i Pro Boxing asaya mezüngbuba kokogo

Aenjeti/January 19, 2019 (Agencies): India nunger boxer Vikas Krishan-i professional asaya nung mezüngbuba asaya Technical Knockout ajanga America nunger asayar Steven Andrade kokogo.
Vikas, shiba Bob Arum’s Top Rank Promotions den tenangzüktepba ka yanglua liasü, pa tang professional jenjang nung mezüngbuba asaya asayaogo.
Hokolbar aonung Stone Resort Casino, New York nung Andrade den asaya ya round trok asayatsü liasü saka iba asaya round ana dang asayaa liasü.
Iba asaya ya Olympic silver-medallist Shakur Stevenson indang IBF Intercontinental aser WBC Continental Americas featherweight title atema Jessie Cris Rosales den asaya under-card asaya ka liasü.
Asaya nung Stevenson-i pa den asayar knock out süja liasü.
“Kü mezüngbuba asaya TKO ajanga kokogo. Nenoki temeim sayuba aser ni pusemba atema kanga pelar,” ta Vikas-i asaya tembangba sülen tweet asü.
Iba asaya masaya tsüngda Andrade-bo trokben asayaadoker liasü. Tang tamakok anguba densema pa asaya pezübuba atonga tamakok nguogo.
Arishi küm 26 tain boxer ya India nunger boxer tem rongnung takok tajungtiba ngua alisang lir. Pai Asian aser Commonwealth Games nung gold medal asem tashi koktetogo. Maneni pai world championships nunga bronze medal ka kokogo aser Asian championships nunga medal aiben nguogo.
Stevenson tebu Wali Moses kübok Vikas iba asaya asoshi renema liasü.
England aser India nung khen danga tamakok mongui asayaba sülen India nunger rongnung Olympic boxing asaya nung mezüngbuba medal angusang Vijender Singh-a Top Rank Promotions den tenangzüktepba ka yangluogo.
Pa US nung mezüngbuba taküm March ita asayatsü sentong yanglua lir.