Ken o asadangba mapang Pandya aser Rahul na asayadakjang: Khanna

New Delhi, Aenjeti/January 19 (Agencies): BCCI acting president CK Khanna-i Honibarnü Committee of Administrators (CoA) dang Hardik Pandya aser KL Rahul na asaya nungi anentsür aliba agintsü mepeshia asüngdangogo.
Khanna-i ashiba agi, Board ketdangsertemi akhangba ama asaya ana inyakyim asadangtsü atema SMG dang ombudsman ka shimtsü asüngdangba ya shidak masü, kechiyong Supreme Court-i taruba hopta iba ken o asadangtsü.
TV chat show ka nung o mekümdangi jembiba atema Pandya o Rahul na asaya nungi anentsür lir.
“Tenati aibelenogo, aser tena asaya nungi anenja Australia den asayatsü orr aliba meyipa anir aruogo. Tenapronglai tatoka meshiogo,” ta Committee of Administrators (CoA) dangi shidi ka nung zülur yok.
“Ken o asadanga aliba mapang nung tena India squad nung züngoksema New Zealand den asayatsü aliba asoshi team den oa adentsü shidanger,” ta paisa ashi.
CoA-i asayar ana tia bendangtsü asoshi Supreme Court nem ombudsman ka shimdaktsüner.
Taoba BCCI tir N Srinivasan sülen anidaker State unit 14 shikatibo Khanna dang SGM jongdak senden ka ayongtsü mepeshiogo, koba anogo 10 tsüngda ayongzüktsüla.
BCCI treasurer Anirudh Chaudhry-ia Khanna-i mepishiba ama SGM senden ka yakta ayongtsü shiogo, aji asünungdang board züngsemtemi ombudsman ka takaratiba nung shimtettsü.
“BCCI temzüng kübok ombudsman ka Annual General Meeting (AGM) nung shimtettsü ta shia lir. Kasa mapang nung iba ken o ya dang Judiciary kübok asadangdar,” ta Khanna-i Chaudhry nem telangzüba agütsü.
Khanna-isa BCCI acting secretary Amitabh Choudhary tebilemba asüngdanga liasü.
Acting president-i CoA aser BCCI ketdangpurtem dang iba ken o takaratiba nung bentettsü mepeshia asüngdangogo.
“Hardik Pandya-i ashiba aser KL Rahul bystander ka ama shilem agiba ya tai lir, saka tena ya ozüng raksar kaka ama benshitsü yabo tai ta nibo bilemer,” ta pai zülutsü.
“World Cup metenzük tsüngda asayar anaprongla asaya balala nung shilem agitsü nüngdaker. Asenoki parnok nem yimyayimpong melenshia aintsü asoshi maongka agütsütsüla,” ta pai maneni shisem.