Serena aser Djokovic na maneni takok ngua odar

Australian Open 2019 

Aenjeti/January 19, 2019 (Agencies): Serena Williams aser Novak Djokovic nati Honibarnü Australian Open nung pei tata asaya koka maneni tejakleni tudar aser kasa mapang nung Naomi Osaka aser Elina Svitolina nata maneni taruba round tongtetogo.
Melbourne Park nung tanü tetsür kija asaya ka nung Grand Slam 23 ben tashi koker alila Williams-i Ukraine tsür Dayana Yastremska 6-2, 6-1 agi koka liasü.
Arishi küm 37 tain asayar-i iba asayamung nung tang tashi nung game teku dang mekoki lir aser la taruba round nung teyi Venus mesera Simona Halep den asayatsü.
“Ni asaya ka nungi ka ta rangloker asayar. Ni akokba tashi meranga asayatsü meranger,” ta lai ashi.
Serena-isa arishi küm 18 tain Yastremska ajungshia ashiba agi, “la kanga dang asayar tajung aser kanga meranga asayaogo. Aiür chanu ka dang süaka la renemer adok.”
Kasa asayamung tebur kija asaya nung top seed Djokovic iba asayamung tenetben koka otsü tasen ka yanglutsü rangloker asayadar.
Canada nunger asayar Denis Shapovalov den asaya nung Djokovic-i set kabo makok saka iba sülen pai 6-3, 6-4, 4-6, 6-0 agi Denis koka liasü.
Iba asaya akokba ajanga asayamung tembangba sülen ranking tasen sangdongba nung Djokovic maneni world number one jenjang nungi masetshitsü.
Pa taruba asaya Russia nunger asayar Daniil Medvedev den asayatsü shibai David Goffin koka liasü.
Tetsür kija asaya tanga ka nung Osaka-i Taiwan tsür Hsieh Su-wei 7-5, 4-6, 6-1 agi kokogo aser la taruba asaya Latvia tsür Anastasija Sevastova den asayatsü.
Asaya nung Osaka-i mezüngbuba set makok aser tanabuba set nunga lai 4-1 agi mekoki liasü, saka lai taruba asaya pongu atonga koka decider asaytsüsa aküm.
“Ni Grand Slam tem nung kanga asayaner anungji ni iba asayamung nung talangba asayatsü atema ni akokba tashi asayaogo,” ta lai ashi.
Maneni tanga asaya ka nung Svitolina-i 4-6, 6-4, 7-5 agi China tsür Zhang Shuai kokogo. Svitolina tapu nung timtem aliba ajanga asaya mapang mapangshia tapu anepalua liasü.
La taruba asaya America tsür Madison Keys den asayatsü shibai Belgium tsür Elise Mertens tsükdakja liasü.
Tebur kija asaya nung Kei Nishikori-i Portugal nunger Joao Sousa koka taruba round tongtetogo. Pa taruba asaya Spain nunger Pablo Carreno Busta den asayatsü.