Kaketshirtem dak tangatetba tajung alitsüla: Dr. Ato

Mima, January 19 (TYO): Kaketshirtemi tazüngba tsütsü tajung akümtsü tebilemba dang masü saka tangatetba tajung alitsüla, ta KOHIMAS Managing Director Dr Tseilhoutuo (Ato) Rhütso-i tanü ashi.
Zaso ground, Mima village, Kohima nung Southern Angami Students’ Union (SASU) indang 69 buba Biennial general conference lapokba sentong nung Dr. Ato-i iba tayongzükba agütsü.
Kaketshirtemi putiotsü azüngba dang masü saka putiotsü nung teinyaktetba tasen züluoka ayutsü atema merangtsüla, ta paisa shisem.
Tanü lanu putu kanga dang tetoktepba alima ka nung alir anungji education ya kaket shisatsü bushiba dang masütsüla saka skill development dena mapa inyaktsü indang tesayubatem agütsütsüla, ta paisa ashi.
Lanurtemi competitive exams nung tamakok ngura, parnok wadang ojang dang ta bilemer saka iba tangatetbaji tai lir. Sorkar mapa angutsü atema dang mebilemi, pei sasa aayanga litettsü atema lenmang bushitsüla, ta Dr. Ato-isa ayongzük.
Kaketshirtemi mapang angatettsüla aser jenjang temabai atutsü atema mapang jungjunga lemsar pei taküm alitsüla, ta paisa shisem.
Dr Ato-isa lanurtem dang temelenshi bener arurtem asütsü aser loktiliba tajungba kümdaktsütsü atema meranga inyaktsü ayongzük.