Nagaland nung aluyimertem atema FOCUS project tenzükogo

Dimapur, January 19 (TYO): Nagaland nung aluyimba tsütsü mezüngbuba internationally funded project ka Honibarnü tenzükogo.
Iba project ya “Fostering Climate Resilient Upland Agriculture System” (FOCUS) lir aser International Fund for Agriculture Development (IFAD) ajanga ketdangsüa inyaker.
Modern scientific knowledge aser natural resources management meyokteper tekong lu tajungba nung ayimtsü atema iba project ya tenzüker.
Tanü Nagaland chief minister Neiphiu Rio-i iba project tenzüktsüdang “FOCUS teloki tangatetba tejentem melena tasen bener arutsüla. Iba project ajanga researchers, development workers, decision makers aser policy makers-i tekong lu ayimba mapa tajungba kümdaktsütsü” ta ashi.
Rio-isa IFAD telok dang Nagaland-i FOCUS project bener arutsüba atema pelaba metetdaktsü.
IFAD, India Representative, Ms Rasha Omar-i ashiba agi, küm trok (2018-2023) tsüngda district 8 nung mapa inyaktsü.
Sen crore 613 project ya Mon, Longleng, Mokokchung, Wokha, Zunheboto, Kohima, Phek aser Kiphire nung inyaktsü aser kilen lakh 1.37 shi atongtsü merangtsü, ta Rasha Omar-isa shisem.
Sentong nungsa Agriculture Minister, G Kaito Aye-ia ashiba agi, IFAD project ajanga Nagaland nung aluyimba dak sendakba rongsenkettsüng ajungkettsü aser aluyimertemi tangatetba melenshi aluyimba mapa inyaktsü imlar.
Department-i iba project atema temulung agüja inyaker aser teyariteper ajaki aluyimertem rongsenkettsüng tajungba kümdaktsütsü atema bendanga agüja aser nendaka inyaktsü ayongzüker, ta Kaito-isa metetdaktsü.
Iba sentong nung APC & Mission Director, FOCUS, T. Imkonglemba Ao, (IAS)-i iba project takok ngua inyaktsü atema agri allied sectors longjemtsü junger ta tebilemba ka shidang.
Sentong nungsa SPD, FOCUS, Nagaland, Angelina Tajen-i FOCUS project indang temetettsü lemsatep.