Mojing nem talidak tagütsü. – Efesa 4:27

Pauli Efesa nunger dang kechi inyaktsüla iba tesayuba agütsü: temulung nung tasen kümang (t.23), nisung tasen semokang (t.24): aser kechi meinyaktsüla: tiyazü tejembi, ne ain adokba manung temenen temena. Kechiba? Pai ashi, na tejen taküm nung dang lira, na teraksa nungsa lir. Nai tiyazü jembira aser kuli makai ain adokra ne taküm Satan asoshi lapoktsür. Ken pa tetsüng ajemokdaktsüra, pai maneni idakji ajemdaktsür aser meilungi ne taküm nung pa alitsü lemang satema lapokyonga aotsü aser pai ne dak chichiba raraji tenzüktsü. Pai tiyazü mesüra ain adokbaji pa nok-o-nü ama agitsü, ibai yakta matsütokra ibai tamajungba küma aotsü aser na mejungi kümdaktsütsü. Iba yagi asenok memeshiba lenmang dangi anitsü, ne tesendaktep raksatsütsü aser na tali temenen menadaktsütsü.
Yakobi ibai yamai rasaa ashir. Mezüng temeneni atitangtsü, idangji azüapung agi pa/la mesüzüktsü. Aser kodang azüapungji mashisa kümdir, temenen asor, aser kodang temenenji tain kümdir, iba yagi tasüba bena arur (Yakob 1:14-15). Inyakyimji tamasayongi tetenzük. Tiyazü jembiba, ain adokba aser tatitang asen taküm nung ataloker. Asenoki koda langzüker? Asenoki ibai indaktsür asü mesüra temechi nung petzüka endoker? Mezüngbuba nung asenoki tiyazü mejembitsüla aser ain matoktsüla saka kodang asenoki inyakdir idangyongjisa nangzükatoktsüla (1 Yn. 1:9). Satan nem mapang tajungji tagütsü. Pa nokdangang aser pai jena aotsü.
Oh, Yisu, ni asoshi Nai tatitang noktangba asoshi Ne tenüng asanger, tatitang ajak noktangtettsü tashi agüjang.