ACAUT-i ayongzükba senden nung ajak adentsü ayongzüker

Dimapur, Sept.10 (TYO) : India den Naga yimten tebilemtsü latettsü anendaka aliba onük nung tebilemba lemsatepba sentong ka Dimapur nung September 12, 2015 nü ACAUT teloki ayongzüka lir aser iba sentong nung sensosanger ajak arua dendaktsüner ta ACAUT teloki mepishia metetdaktsüogo.
Anogo anasemka jakdang, Naga Hoho aser NSF teloki iba senden anema sangdongba osang ka jangjashia metetdaktsüba sangdong nung, tanü Brehostibar nü ACAUT teloki iba senden nung adenertemi teka mekanga kecha ken o agizüka merenemtsü mesüra pangzünga meyanglutsü saka Naga nunger lenirtem jadena pei pei bilemba jembidaktsütsü ta metetdaktsüogo.
Iba senden nung tongtibang nisungtem aser arogo lenirtem jadena Naga yimten latettsüba onük nung pei bilemba lemsateptsü, anungji senso ajak aruagi angatsü aser ken o lemtepba nung shilem agitsü akok. Iba dakji alaka ken o kecha lemteta mayutsü, anungji lokti tentettem kari arendaka bilembaji mangatetba agi asütsü ta ACAUT sangdong ajangasa metetdaktsü.
ACAUT Nagaland teloki ayongzükba “Common Platform,” sentong ya September 12,2015 nikongdang 3:00 ako nung DDSC, Dimapur nung alitsü ayongzüka lir. Iba senden nung Naga kin shia nungi lokti tentet (tribal Hiho), district shia nung ACAUT units, watsü tentettem, kaketshir aser lanur telongjemtem, GBs aser DBs unions, kaketrejutem nungi kaketshir aser tesayurtem, arogo nungertem aser business inyakertem ajak arua dendaktsüner ta ACAUT teloki mepishia metetdaktsüogo.
Ano, talisa Dimapur nung DUCCF kübok aliba mendenpurtem aser nübortem ajak arua adentsü mepishir ta parnokisa metetdaktsü.