‘Good News’ Rongjui 6, 2019 nü sayatsü

Aenjeti/January 21 (Agencies): ‘Good News’, koba Kareena Kapoor Khan aser Akshay Kumar na küm pezü sülen screen nung longjema shilem agiba angutsü, iba film ya Rongjui/September 6, 2019 nü sayatsü ternemba lir, ta Tentonü/Mon. Hombarnü film yanglur Karan Johar-i sangdonga liasü.
Mezüngbo iba film ya Chiteni/July 19, 2019 nü sayatsü sentong liasü saka film dak sendakba maparen kar metemtetba ajanga film sayatsü atema anogo melenshitsü.
“‘Good News’ film Rongjui/September 6, 2019 nü sayatsü,” ta Twitter ajanga Karan-i lemsatep.
Iba film sayatsü anogo osang sangdongtsü ghonda ka tejakdang Karan-i Twitter ajanga user tem den asaya aser mesüshia liasü.
“#GoodNews! kar atema nenoki arema mapang tatsüka atatsüla….Der aaye durust aaye,” ta Karan-isa lemsatep.
Kareena aser ‘Gabbar Is Back’ nung tongti shilem agisang Akshay dak alaka, iba film nung Diljit Dosanjh aser Kiara Advani nati shilem agiba angutsü.
‘Good News’ film ya comedy den family drama ka asütsü kong Akshay aser Kareena nati apuani ka tanur asotsü merangba indang shilem agiogo.
Tesüiba küm nung Akshay o Kareena nati film tem talisa ‘Ajnabee’, ‘Kambakkht Ishq’, ‘Tashan’, ‘Aitraaz’ aser ‘Bewafaa’ nunger nung külemi shilem agiba nguogo.
Kasa film nung Diljit aser Kiara nati Punjabi nunger apuani kati tanur aginüba indang shilem agiba angutsü.