Kitami nung seminar ka ayonga agiogo

Dimapur, Aenjeti/January 21 (TYO): Kitami tesem nung Aenjeti 19, 2019 Honibarnü social worker ana – Kahuli aser Victo na densema anogo ka atema waste management seminar ayonga agia liasü.
Iba seminar nung shisalen sayur anaprong yagi melentepa jana tapu balala aser item jana bendena tesem ka nung timi indoktsüba indang jembia liasü.
Shisalen sayur ana yagi, shisaa aotsü akokba janatem, talisa kidang chiyongtsü aser süngolemba anüngzükara meindoki tesem ka nung bendena yur ali temu ama amshitsü atema seminar nung adenertem dang mapa agi inyaka sayu.
Kasa sentong nung Kushe Humunity Foundation nungi Vitoshe-i iba (KHF) tentet aser inyakyimtem indang telok dang rasaa ashi. Kitami yimtsüng tenüng nungi Viniho Achumi GB-i jembia liasü.
Sentong agiba mapang 2018 küm Pughoboto nung yimtsüng temürektiba rongnung Kitami yimtsüngi takok jenjang anguba indang lepshia ashi. Iba award nung kulikaket (certificate) den senpet sen lakh 5 densema lir, koba LADF Pughoboto ajanga agütsü.
Iba sentong nung EAC Pughoboto, Nuhuta Tunyi menden liasü aser kasa mapang CDPO Ghathashi, Junito Jimo-i tepela anküp o jembi.