Tagi : Agüjang

Shibai auyaa liasü, pai joko tauya, saka tenüngdaktsü akaba nisung nem tagütsütsü alitsü pai pei teka agi kechi mapa tajung, aji inyakang. Efesa 4:28
Pauli maneni iba tekümdangtsü nübur nem maneni agütsür. Pai parnok dang meyazütsü mesüra ain matoktsü ashi. Tang parnok dang mauyatsü ashir. Tsüngremi ibai Israel nung yakta ozüng agütsür liasü. Nai mauyatsüla! Mapang timba nüburtemi auyar, ibai inyaker kechiaser parnoki ozüng ter rongnung ka raksar. Nai tenükshi! Kodang kari tangar akaba aginüdir, mezüngbuba nübu jagi ibaji ozüng raksaa agitsü meranger. Gari mesüra sen asütsü akok, ano karibo tangar kinüngtsüa anizüka anir aor.
Auyabaji temenen ka lir aser ibaji Khristan taküm nung shilem ka mekümdaktsütsüla. Iba melen tangar nem tagütsütsü akatsü asoshi Khristan taküm nung mapa meranga inyakba alitsüla. Khristan kati tangar meyirutsütsüla saka nüngdakba pur maneni yaritsü merangtsüla. Asenoki auyara asenoki temenen dang menar masü, asenoki Khrista indang kuli asüba mapa raksatsür. Tangari asenok Khristan ta metetra, asenoki Khrista asoshi kuli asür. Tangari asenok ngur parnoka asenok ama sünüba kuli asüba lir, asenok ngur, “Ni kechiba Khristan akümtsü?” ta shidaktsüra ibaji kuli mejungi asüba lir. Pa/la tangar den kecha balaka masü. Khristai asenok nem agütsüba tanabuba ozüng tuluji atalokdaktsüdi: Asenoki asen kiyonger dang parnok nüngdak nung yariba ajanga meimdi.
Tsüngrem, tanü ni auyatsü mebushii nüngdakba pur bushia yaritsü yariang. Amen.