Citizenship Bill ajanga bendangertem senoka maittsü: Sonowal

Guwahati, January 22 (Agencies): Citizenship (Amendment) Bill 2016 agizükba sülen Assam-i bendangertem senoka maittsü ta Mongulbarnü Assam chief minister, Sarbananda Sonowal-i ashi.
Tanü Asom Sahitya Sabha aser lisopur kintem nungi literary teloktem den ajurutepa senden amendang Sonowal-i Citizenship (Amendment) Bill, 2019 aser tanga tebilemtsütem asoshi sorkar indang tangatetbatem lemsatep.
Assam Accord nung Clause 6 mapa küma inyakba ajanga Assam nung litsü, oshi, local teloktem, panchayat, mapa kümzüka ayutsü ta Sonowal-isa nangzük.
“Citizenship (Amendment) Bill, 2019 agizükba sülen bendangertem aika Assam-i senoka aittsü ta jembir saka ibaji tiyazü lir” ta paisa ashi.
“Iba ya national policy ka lir aser tamangba yimsü tsütsü reshikangshi tia ajuruba ateam India nung jenoktsü atema asüngdangba telok tila 6 yaritsü atema lir. Iba tebilemtsü ya linük ajungai külemi abentsü” ta Sonowal-isa ashi.
Iba bill ya Assam anema ta nisungtemi jembir saka state sorkar ya Assam nungertemi kümtetba lir aser onoki Assam nunger kümzüka ayutsü, ta paisa shisem.
“Iba tangatetba aliba ajanga sorkari ali maliba lisopur nem land pattas agütsür aser lisopurtemi ali aser sobaliba azüoktsü atema mapa inyaktsür” ta Assam chief minister-isa ashi.
Assam nung kin 6 nem Scheduled Tribe (ST) jenjang agütsüra, tang Scheduled Tribe (ST) nisungtemi timtem ajurutsü ta tsübutepba atema Sonowal-isa “tang Assam nung ST kintemi tangutsü angubatem kümzüka ayutsü” ta nangzük.
Tanü senden nung Assam Language Bill, sorkar official correspondence atema Assamese oshi amshitsüba aser Unicode nung Assamese oshi fonts endoktsü onüktem benoka lemsatep.