2nd Lt. Limatemjen Memorial Futsal Tournament tenzükogo

Alem Jongshi-i 2nd Lt. Limatemjen Memorial Futsal Tournament tenzüktsüdang mezüng match asayatsüpur den salemyonga aoba angur. Mokokchung, January 22, 2019.

Mokokchung, Jan 22 (TYO): NCS Rtd. Wb. Alem Jongshi-i Jan 22 nü Mokokchung Multi Sports Complex nung 2nd Lt. Limatemjen Memorial Futsal Tournament meraketa tenzüktsüogo.
Taküm iba sentong nung telok 11-i shilem agitsü aser shir teloki champion bendir par telok nem kuli kaket den senpet sen ` 30,000/- aser tanabuba jenjang nem ` 20,000/- agütsütsü. Iba den ano nija/jurila senpet kar nem agütsütsü, ta tayongertemi metetdaktsüogo.
Asayamung lapokba sentong nung tongti tesemdanger Wb. Alem Jongshi-i jembidang, taoba mapangbo saisapongba ya mapang intoktsü atema asayaba hobby ka amai dang asaya aru, saka tanübo saisapongbaren ya luyim tulu ka kümogo, anungji, iba luyim nung temulung agütsütsü asoshi tayongzükba ka agütsü.
Paisa asayar ka dak lidaktsünüba jakla/noklem kar ashidang, nentaka, ochishia, temulung agüja, taremzük lia, temulungtetba yur, tazüokba nung meranga asayatsüla. Item jaklatemji melira mapa kecha nunga takok mangutsü, ta paisa shisem.
Mapa aisü nung mezüngpur asüba ajanga state sorkari Mokokchung district nem ‘land of pioneers’ nüngja agütsüogo, aji oda, saisapong tsütsü nunga Dr. T. Ao-i Indian football team pa lenisüba nung Olympic nung shilem agi. Aji saka, tanübo asen district nungi pa tsüngsü nung anitaker aser pa adoksaa nisung kata madokteter, anungji, “asenok khuret tulu lir”, ta paisa sasaseta ashi.
“Ao kinji tetenzüker tajung saka tatem nung junga metembanger”, ta pai ashi. Ao kin dak tezü metangi maneni meranga inyakba ka mali, anungji, mapa aika nung asenoki takok munguteter, ta tuteta ashi. “Asüng takok angutsü atemaji maneni aser atsüanem mekai merangba jaklaji akettsü tim”, ta paisa ayongzük. “Anitaktsü meshira anishitsü mashitsü”, ta paisa mulungsentsü melenshidaktsünüba olen ka ashi.
Nisung ajaki sorkar mapa mangutsü aser nisung ajaki business mapa meinyaketettsü, anungji, nisung karibo saisapongba nung temulung agüja asayatsü asoshi paisa lanurtem dang tatishitsü tajung aika bener arua lemsatep.
Tanep iba sentong Imlikala compere liasü, Artang Baptist Arogo Pastor, Bendang den sarasademer tenzük, Organizing Committee convener, Sanglipong-i tarurtem ajak pela agizük. Tsürabur Bendang Aier aser Molungkimong Union Mokokchung tenüng nung Lima Longchar nati o tatsütsü jembi. CTC nung azünger Opangsunep-i ken tajung ka aten. Tongti tesemdanger meina Ungma yimtiba nungia yimsüsürtem arua iba sentong meraketdakja liasü.