Swachh Bharat Abhiyan sentong nung PB Acharya-i shilem agi

Dimapur, Aenjeti/January 22 (TYO): Dibrugarh jila nung Aenjeti/Jan. 22, 2019 nü Swachh Bharat Abhiyan sentong ayonga agiba mapang Nagaland Angh aser Swachh Bharat Mission atema National Brand Ambassador, PB Acharya den North East NAMASTE States Swachh Bharat Mission Committee indang Ambassador tem külemi shilem agia liasü.
Sentong nung jembiba mapang Acharya-i ashiba agi, merükmejuba ya kidang nungi tenzüktsüla aser kibong shia nung metsü-meshiba tajung yanglua alitsüla. Iba den külemi tesem mashi mashi nung metsü-meshiba tem temabangtsütsü atema pai tayongzükba agütsü.
Kidang metsü-meshiba jung junga yanglutsü aser asen libajen merüka ayutsü atema Acharya-i nenshia metetdaktsü.
Angh-isa, Mongputeni/Oct. 2, 2014 nü India Ato Kilonser, Narendra Modi-i Swachh Bharat Mission tenzüktsü aser iba ya merük meju inyakyim rongnung tulutiba lir kong linük nung sorkar tenzükertem, school aser college kaketshirtemi shlem agidar.
Iba sentong atemba sülen Dibrugarh jila nung Acharya aser pa kinungtsüi anir nübudok mapa ka ayonga inyaka liasü. Iba nübudok mapa nung North East NAMASTE States Swachh Bharat Mission Committee aser nüburtemi shilem agiogo.
Swachh Bharat Abhiyan sentong ya Convener North East NAMASTE States Swachh Bharat Mission Committee, Shri Sotai Kri, Arunachal Pradesh-i anir North East NAMASTE States Swachh Bharat Mission Committee na longjema ayongzüka liasü.