EVMs tim mesüi amshiteter ta ashisang anema FIR benok

New Delhi, January 22 (Agencies): Electronic Corporation of India Ltd nung taoba mapa inyaker Syed Shuja-i India nung electronic voting machines (EVMs) tim mesüi amshiba kuli kar agütsü.
Hombarnü London nung sentong ka agidang Shuja-i 2014 general election nung EVM tim mesüi amshi ta kuli agütsü.
Iba atema Election Commission of India (ECI)-i US nung amenoka aliba Indian “cyber-expert” Syed Shuja anema ken o ka benokogo.
Shuja-i pa EVM design telok nung dena liasü aser Indian elections nung amshiba EVMs nung tim mesüi amshitsü koka lir ta onoki media osang ajanga angashi, anungji iba ken o jungjunga bushisüngdangtsü, ta ECI-i metetdaktsü.
Pa taküm lendong tia ka nung alitsüsa akümba ajanga United States nung political asylum angu, ta Shuja-isa ashi.
Pai ashiba agi, 2014 elections nung Bharatiya Janata Party-i data transmission nung teka aiba ajanga Congress-i menden 200 shi angutsü aliba mengutet.
Linük kübok “military-grade modulators” ajanga BJP-i EVM nung tim masüba mapa inyaktet ta paisa ashi saka kulibo ka danga magütsü.
Iba sentong ya Indian Journalists Association aser Foreign Press Association-i ayongzüka agi. Shuja-i iba osang metetdaktsüba sülen ECI-i EVMs nung teka aitsü makok aser Shuja anema kechi inyaktsü’ar lenmang bushidar ta metetdakja liasü.