Yimten aser Arogo pangdak

– Talitemjen Imchen.

Kechi telok südir süaka, kong temzüng aika lidir, iba telok ji tejaklen-i aoba telok ka masür. Mesüra tejaklen-i aoba telok ta ajatsü makok. Temzüng tali tali mapang shia yanglulokba ji telok jangyu memedemba tera lir. Temzüng mesüra guideline aika aliba ji, aiben süngdong ka süngzü agi naipanga rajang kümdaktsüba mesüka akümer.
Yimya agi nisung kati tongtipang telok ana nung alir. Yimten aser Arogo. Arogo tentet dang ya tanülar tentet ta ajatsü akok. Sobaliba telok tentet mesüra mulungtet telok tentet balala ajak Yimten tentet den sendaktepa kar. Aser ajak ji nisung ka asoshi taküm azüoka, jenjang meteta alitsüyim lir. Yimya agi Yimden nung temzüngtem ayur aser Arogo nung guideline (temzüng) ayur. Itemji nisung kati dang telok tentet balala nung anidaker aser anir asünung, aiben Yimten aser Arogo inyakyim meyoktepa kümdaktsür. Saka Yimten aser Arogo ranglok aser inyakyimji khenyongi balala kar.
Aiben asenoki temzüng aser guideline yangludang teti agitsü aser ajungtsü ama bilema yanglur ayur. Saka lialia mapet akümer. Kechiaser alima ji ainer aser putu yimyaji melenshir atar. Sobaliba aruba tsütsüji tongmelang agi shisadangra, tesüiba inyakyim mesüra ken o bendangyimji aika tai ama aseni bilemer. Saka parnok putu mapang tensa den tapet ken o bendangbatem asütsü aser lir.
Yimten süaka, koba telok tentet südir süaka, kodang temzüng aika yangludir, tangar telok memenepi akümer. Telok lirumedema anir aotsü asoshi ketdangpurtem shimteter aser parnok yariteptsü asoshi sanen luden ayur. Parnok nem nübur lennitsü tashi peria agütsütsü tim aser telok ji akangalonga bener odaktsütsüla. Lennirtem-ia ken o ajuruba shia temzüng aser guideline tasen yangluloknüba yimya ya anentsüla. Temzüng aser guideline renlokba jagi telok ka dang tali rajang akümer. Ano tesasatsü ka ji, alima tejaklen-i aoba indang jembir, saka ken o bendangtsü asoshi, tensa nung apet bendangtsü merangteper masü, tesüiba mapang koma bendanga aru kasa ji bendangtsü merangteper. Joko iba ama ken o bendangba yimya ya ajema kümdaktsütsü tenüngdaktsü. Kechiaser asenok küm nung dang tain akümer masü, shisatsü, libaliru aser asen jakdang tagitarutsü ajak tajungbalen-i sayatenyatsüka melenshia ainer.
Arogo tsütsüji kodang reprangdangdir, yimten temzüng kwi amshir, ajakji Arogo guideline (temzüng) nunga inoker amshiner. Nisunger azüoka wainshia alitsü temzüng dang asünung, telok nung temzüng ajakji tapet ama dang mesüka angur. Saka Arogo nung temzüng ji Laishiba dang asütsüla. Guideline yunürapang yimden temzüng ama masü saka kanga ajema ayutsüla. Aser aji Sannüker-i anir Arogo Luden (Deacons) ajanga Tsüngrem-i mulungba ama amshitsüla. Arogo nung kodang yimten ama guideline tali yangludir, iba Arogo ji tobur junga motettsü aser temenünütsü tentet ka dang akümer. Arogo aika nung guideline tem pei-i inoka ayu memetet, pur tajungi inoka ayu memetet ta guideline agi sünger, tanülar Arogo ama motet chitaka kümogo.
Yimten ken o nung telok timbai mulungba agir. Saka Arogo ken o ajakbo tempanga mejembir. Arogo nung ken o karbo Tsüngrem dang sarasadema bendangtsüsa kar. Yimten nung tanüla-i jembiba sabua mejembir. Saka Arogo nung tanüla tejembiba balala kar. Tsüngremer mapang tatong nung jembiba sayatenya balala kar. Ibajiang Arogo asoshibo apongmen (preamble). Saka kodang Arogo nung guideline aika lidir, iba jagi tanüla tejembiba aser Tsüngremer sayatenya chimidaktsür. Yimten nung aibelener ajak Yimten Salang nung ken o tempanger. Arogo nung aibelener timba Tsüngrem-i meremshir. Kechiaser Arogo temzüng ji Pa o (Laishiba) nung amenoker lir. Ano aiben telok-i taidok magütsütetba aibelenertemji, Tsüngrem-ibo taidok agütsür.
Anungji, Arogo aser Yimten pangdak ana ranglok aser inyakyim ji benteta amshitsü nüngdaker. Temzüng aser guideline ajema telok nung ayuba ajanga Ao kin lokti tentet balala tali tashi taitba nung lirumedema otettsü tamang akar.