Ao Arangtet Tatidang nisung 151-i agütsüogo

ASLB-i ayongba Ao Arangtet Tatidang centre ka nung agiba mapang tangokba noksa nung angur. Mokokchung, January 23, 2019.

Mokokchung, Jan 23 (TYO): Jan 21 nungi tenzüka anogo asemnü tashi Ao Senden Literature Board (ASLB)-i achayanga agiba Ao Arangtet Tatidang Centre asem – Mokokchung, Kohima aser Dimapur nung takok ngua agiogo.
Taküm P.U level nungi tenzüka Graduate aser PGD course balala atema centre asem nungji nisung ajak agi 151-i tatidang agütsüogo. Mokokchung centre nung parnok 118, Kohima centre nung 11 aser Dimapur centre nung parnok 22 liasü. Tatidang agütsür rongnung tetsür teimba liasü. Mokokchung nung Jubilee Memorial School, Kohima nung Chandmari HSS aser Dimapur pur Mission HSS nung agi.
Arangtet Tatidang ya tongtibangsa Ao oshi zülumen lirumedemba den külemi oshi wazüka aser tejakleni awa oa bener aotsü nükjidong nung joko taküm agi küm ter (10) dak tali ASLB-i achayanga mapang shia ayongzüka akar. Iba tatidang ajanga course balala nung certificate aser diploma agüja arudar.