Assam-i party ajak tebilemdangba angadangtsüla: Mukul

Shillong, Aenjeti/January 23 (Agencies): Meghalaya State Assembly opposition lenir Dr Mukul Sangma-i Mongolbarnü,, Meghalaya den mapang talangka arrtsü dak sendakba nung ken o bangdaka aliba bentettsü atema Assam-i political party ajak tebilemba angadangtsüla ta shiogo.
Congress lenir tejen aser taoba Meghalaya chief minister Dr Mukul Sangma-i ashiba agi, Meghalaya-i arrtsü dak sendakba nung political party ajak tebilemba angadanga küm ishika tejakdang resolution ka agizükogo.
“Assam-ia iba amaji inyaktsüla mesera temerang danga merangdangtsüla,” ta state ana terenlok atema kidanger state ana külemi longjemer inyaktsüba indang jembidang Sangma-i ashi.
Iba ken o ya Congress pur election manifesto dak sendakba nung senden amenba mapang jembia liasü.
2011 küm Dr Mukul Sangma CM asüba mapang Meghalaya sorkari Assam nem mangatettep aliba tesem 12 parnok meyong kümdaktsütsü khanga tezüluba nung takhangba ka agütsü aser iba den iba tebilemtsü ya angatetteptsü shia liasü.
Taoba küm November ita Assam, West Karbi Anglong district aser Meghalaya kübok West Jaiñtia Hills aser Ri-Bhoi district tem nungi MLA aser ketdangsertem senden ka menogo aser iba senden nung parnoki kidanger tsüngda mangatettep adokba nungi jenbotsü atema Meghalaya-Assam arrtsü len terenlok maparen balala inyakba mapang nung osang agütsütetptsü mulungtepa liasü.
Iba senden ya Ri-Bhoi district headquarter Nongpoh nung mena liasü.
Iba senden nung terenlok maparen balala benoka inyaktsüba ken o aika benoka jembiogo aser Assam police-i arrtsü nung Meghalaya-i yangluba kiojen tem raksatsüba indang dena jembia liasü.