Rohingya nunger 31 Tripura police nem agütsü

Agartala/New Delhi, Aenjeti/January 23 (Agencies): Mongolbarnü BSF puri Rohingya Muslim nunger parnok 31 Tripura Police nem agütsüogo. Parnok ya India-Bangladesh arrtsü nung taolen makai anogo 4 tashi aliba sülen tang police nem agütsüogo. Kasa mapang nung Assam nunga kasa kin nungi nisung 30 apuba ketdangsertemi metetdaktsüogo.
Rohingya nungertem ya Jammu and Kashmir nungi aru asütsü ta amanger aser parnok ya Indo-Bangladesh arrtsü len atsü adena orr nisung shinga maliba li nung January 18 nung taolen makai liasü.
Parnok ajanga Border Security Force (BSF) aser Border Guards Bangladesh (BGB) na tsüngda mangatettep adoka liasü. Telok anapronglai parnok litsüi Rohingya nungertem ya yok ta kati ka dak tongloktsütep.
BSF aser BGB na iba ken o dak sendakba nung olemtetba tatembangka dangi marutetba sülen Rohingya nungetem ya Tripura Police nem agütsütsü telemtetba agi.
Rohingya nunger parnok 31 ya medical check-up agir külen West Tripura district okadaki anir ao, kong parnok anogo 14 judicial custody nung ayutsü tetuyuba agütsü, ta ketdangseri ashi.
BSF, Deputy Inspector General Brijesh Kumar-i ashiba agi, “onoki iba ken o BGB den jembiogo aser Rohingya nungertem ya Bangladesh-i aitdaktsütsü mepeshi, saka parnoki magizük. BGB ten sensaksem aiben kaogo saka tamakok nguogo. Ajiasünung onoki parnok police nem agütsü.” Battalion commander-level senden ka Zero Line nung Deobarnü mena liasü, ta ketdangseri ashi.
New Delhi nung ketdangsertemi ashiba agi, BSF-i iba sensaksem indang osang Home Ministry nem agütsüogo.
Ministry nungi temelaba agütsüba sülen BSF puri Rohingya nunger parnok 31 West Tripura district police kübok Amtoli police station nung agütsüogo aser iba ajanga Bangladesh den mangatettep aliba tembangogo.
Ketdangserisa ashiba agi, state police-i Rohingya nungertem osang tejangja agitsü aser BSF pur dang iba mapa atema teyari agütsütsü shiogo.
Parnok ya Jammu and Kashmir nungi aru asütsü ta temulung melemi bilemer, ta ketdangseri ashiba den ken o bushitsüngdangba sülenang ochiji jangjatsü, ta ashi.
Amtali police station, officer-in-charge Pranab Sengupta-i PTI dang ashiba agi, tetsür 9 aser tanur 16 densema Rohingya nunger 31 temang asadangtsü atema Tripura Medical College-i yokogo aser parnok ajak temang anema lir.
Paisa, BSF puri parnok nem chiyongtsü, tzü aser tanga tenüngdakba osettem agütsü, ta ashi.
BGB puri parnok ya India nungi ait ta ashir aser kasa mapang nung BSF puri India tsütsü atsü rakpoker aoba kecha temaitsü mali ta ashir.