SP aser BSP na den akokba tashi yariteptsü melunga lir: Rahul Gandhi

Lucknow (Uttar Pradesh), January 23, 2019: Tanü Lucknow yimti nung Congress Tir, Rahul Gandhi, Chaudhary Charan Singh International Airport tonga arudang party nung inyakertem aser lenirtemi pa agizükba noksa nung angur.

Amethi (Uttar Pradesh) January 23 (Agencies): Regional party tem- Samajwadi Party (SP) aser Bahujan Samaj Party (BSP) nati Uttar Pradesh nung taruba Lok Sabha election teloktep nung Congress sendokogo, ajisüaka tanü Congress party Tir, Rahul Gandhi-i, SP aser BSP na den yariteptsü melunga dang lir, ta metetdaktsü.
Tanü Amethi (Uttar Pradesh) nung osangbenertem den jembidang Rahul-i, “Ni Mayawati aser Akhilesh na kanga akhümtsübur. Onok party balala süaka tangatetba aika mesüktepa lir. Onokisa BJP anema rarar, anungji onoki parnok den akokba tashi yariteptsü melunga lir,” ta metetdaktsü.
UP nung SP aser BSP nati taruba election atema parnok loktepba osang sangdongba sülen anogo ka lir January 12 nü Congress-i, party-i UP nung Lok Sabha menden 80 prongla nungi tokteptsü, ta metetdakja liasü.
Congress national general secretary, Ghulam Nabi Azad-i, iba teloktepji ajanga party ajangzüktsü, ta jembia liasü.
January 13 nü Azad-i, “Teloktep ka yanglu asübo onoki menden 20-25 nung tokteptsü liasü, ajisüaka tangbo onoki menden ajak nungi tokteptsü,” ta metetdaktsü.
SP-BSP teloktepi Amethi aser Rae Bareli menden nabo Congress nem toktsü. Iba menden ana ya Rahul Gandhi aser Sonia Gandhi na toktepba menden lir.
Osang angazükba agi, Congress-i UP nung party tilatem den lokteptsü meranger; parnoki menden 60-65 shi nungi tokteptsü aser teloktep party tem nem tanüngba menden agutsütsü.