Priyanka-i yimtenren nung ajemokogo

New Delhi, January 23 (Agencies): Congress Party Tir, Rahul Gandhi teno, Priyanka Gandhi-i yimtenren nung ajemoktsüa akok, ta küm aika jembia aruba sülen tanü lai yimtenren nung ajemokogo.
Tanü Congress Tir, Rahul Gandhi-i teno Priyanka Gandhi Vadra, Uttar Pradesh All India Congress Committee (AICC) General Secretary shimogo.
Congress-i sangdong ka ajanga, Priyanka-i February ita mezüngbuba hopta nungi General Secretary mapa agizüka inyaktsü, ta metetdaktsü.
Priyanka yimtenren nung ajemokba osang sangdongba sülen Congress lenir, Motilal Vohra-i, “Priyanka nem agutsüba mendenji kanga tongtibang. Iba ya ajanga anüdoklen Uttar Pradesh dang masü saka tesem aika kongshitsü,” ta metetdaktsü.
Taoba mapang elections nunga Priyanka-i Uttar Pradesh nung Congress party asalentongtem aser nüboyim sentongtem nung yaritepa aruogo. Lai mapang shia tetsü, Sonia Gandhi’er constituency- Rae Bareli semdanga Lok Sabha aser Assembly elections ajak nung nüboyimja aru.
Iba dak alia Congress Party-isa K C Venugopal, AICC General Secretary shim, ajisüaka Karnataka nunga pa maneni AICC General Secretary in-charge asutsü.
Tawa Madhya Pradesh assembly elections nung BJP tamakok ngudaktsüba nung shilem tulu agisang, Jyotiraditya Scindia, Uttar Pradesh West nung AICC General Secretary shimogo.