Sudarshan News Channel-i Ruzazho yim ‘adopt’ süogo

Ruzazho (Phek), January 23 (TYO): Netaji Subhash Chandra Bose sor küm 122 ajungba nüngtem nung Delhi nung amenoka aliba Sudarshan News Channel Ltd.-i tanü Phek District kübok Ruzazho village ‘adopt’ süogo; iba yim ya mezüngbuba Azad Hind Government administered village (1944) ta züngshir.
Tanü Corporate Social Responsibility (CSS) kübok iba yim shimba sangdong agutsüba sentong nung jembidang Sudarshan News Channel CMD aser Editor-in-chief, Suresh Chavhanke-i, iba yim shimba ajanga Sudarshan Rashtra Nirman Trust-i tezülen aliba yim (Ruzazho) ya lenla ajak nung renloktsütsü atema inyaktsü, ta metetdaktsü.
Paisa, iba Trust-i Central sorkar den jembia senotsü meshizüker gari lenmang yanglutsütsü aser Heritage Village ka kümdaktsütsü; iba dak alia Ruzazho nung Bose anenzükba ki ya national museum kümdaktsütsü aser Eklavya School-a ka amenoktsütsü, ta metetdaktsü.
Trust-i iba yimtsüng nem facilities balala agutsüba den social media aser information technology ajanga India lima tesem ajunga den sendakteptsütsü, ta paisa metetdaktsü.
“Bose iba yimdak mongzükba mapang nung pa den yariteper ajak nem pension agutsütsü atema Trust-i inyaktsü,” ta pai ashi.
Chavhanke-i, pa indang channel ajanga iba yimdak aliba tejangrar lanurtem atema yimti tulutem nung mapa agutsütsü asoshi inyakba den külemi journalism nung ajemoktsü asoshi ajak nem angati training agutsütsü, ta metetdaktsü.
Iba yim ya Digital Ruzazho kümdaktsütsü, ta shia pai, iba yim ya wi-fi angati anguba yim kümdaktsütsü aser connectivity atema tayimtsü (helicopter) anentsü asoshi helipad ka yanglutsütsü, ta ashi.
“Ni nungitang aser ni Ruzhazo yim renloktsütsü. Iba nükjidong matalok tashi onoki mapang shia iba yim semdangtsü,” ta pai sangdong.
Kasa sentong nung NEPED Chairman, Kevechutso Doulo aser Sudarshan Coordinator T Sanyal natia jembia liasü.
Sentong nungsa Nagaland Higher & technical education Minister, Temjen Imna Along onük Doulo-i zünga metetdakja liasü.
Iba sentong ya Dr. Er. Vekho Swuro leniba nung agi; Ruzazho village council chairman Jolelhu Veswuh-i lokti pelaa agizükba o jembi aser management committee convenor Zaposeyo Shijoh-i tepela anküp o jembia liasü.