Limapur kümshiba

Tripura nung  Khristan kibong 23 nungi tamanger 98 tashi tawa Hindu yimsü dangi meyipba osangji Khristantem asoshi saksalemtsüba osang ka asütsü. Hindu nungertemi Khristan purtem Hindu akümba mapaji tanaben kidangi shilangba mapa ka lir ta züngshir. Atangji, aji shitak kechiyong parnok tamasabo Hindu nunger limapurtem liasü aser temulung meyipa Khristan aküm. Ajisüaka, Khristan-temi limapurtem ajak Tsüngrem temeim meteta temulung meyipdaktsütsü merangba ama, India nung Hindu nungertemi tanga yimsü amangertem talisa Khristan purtem ajak tanaben temulung meyipa Hindu yimsü amangdaktsüner. Hindu yimsü ketasener telok Vishwa Hindu Parishad (VHP) aser Hindu Jagaran Mancha teloktemi balaka India ya Hindustan ta melena amshiner. Tetezü India nung tamangba yimsüji Hindu dak alaka tanga yimsü melidaktsüner. Atangji, alima nung tamangba yimsü ajak tajung dang , kechiyong tamangba yimsüi nisungtem dang mapa tajung inyaktsü aser meimtepa alitsü indang ashir. Ibayongji, Khristan purtemi alima meimchir ajak Khristan tajung kümdaktsüner aser pei tanüla dena mesamai kotaki odaktsüner. Iba amaji Hindu nungertemia nisung ajak Hindu yimsü amangertem kümdaktsüner. Iba kasaji tanga yimsü amangertemia bilemer aser inyaker. Aji oda, nisung taküm aser tanüla kümzüktsü asoshi tamangba yimsü ka agizüdaktsütsü merangba mapa nung kecha tai mali. Iba tangatetba nung India temzüng yanglurtemia India lima nung yabo senso shia asoshi pei amangnütsü amangtsü aser sayutsüngia asütsü temeten agüja lir. Ibayongji, India yabo tamangba  yimsü ajak amangtetba aser sayutetba tesadem lima ka lir. Ajisüaka, India nung tebilemtsü kaji, tanga yimsü amangertem Hindu yimsü dangi meyipbajibo tim, ibaji pei kidangi shilangba ( Ghar Wapsi) mapa ka dang lir saka Hindu nunger kati tanga yimsü agizükra, ibajibo linük temzüng ozüng anema inyakba mapa ka akümer. Iba ozüng ya talisa Khristan-tem anema latetba ozüng ka lir. India tesem aika nung Khrsitan-temi  school aser mozü ki lapoka timtemer aser makamaitertem yariba ajanga parnok aika Khristan akümba otsü lir. Item ama Khristan-temi inyakba mapatem ajanga Khristan mekümaka Hindu aser Muslim nungertema tajung aika kümogo. Atangji, Khristan-temi inyakba mapatemji temeim mapatem lir, anungji Hindu nungertemi item temeim mapatemji Khristan kümdaktsütsü asoshi mesüzükba mapa amato bilemer. Aji oda, India nung sensaker paikaya anogo nung chi kena mechiyong aser shirangdanga mozü süngjang ka malitettsüba purtem dang parnokibo temeim mapa mesayutetter aser Khristantemi inyakbaa tenük meremer ta asüba tsüngda makamaitertem aika akoksadagi. Joko,  Hindu nunger telok RSS, VHP aser Hindu Jagaran Mancha teloktemi India nung teküpbok jenjang nung alirtem rongnung shirnoksa tanga yimsü agizüka lir, itemji tanaben Hindu dangi meyiptsü asoshi tesem balala nung sentong tajung ayonga akar. Item sentongtem ajanga, talisa Khristan purtem aika Hindu yimsü dangi meyipdagi. Iba tatalokba ajanga Khristan-tem rongnung kija-kibong aser arogoi inyakba mapatem khen reprangshitsü akanger. Atangji, tangari bilemba ama asenoki tangar Khristan kümdaktsütsü asoshi limapurtem rongnung temeim mapa inyaker saka Tsüngrem temeim indangbo mangatetdaktsür. Anungji, aika asoshi Khristan akümbaji pei taküm aser tanüla kümzüktsü asoshi masü saka senotsü aser taküm nüngdak asoshi teyari angutsü atema Khristan akümer amai bilema akümer. Itemji, Yisui ashi ama, asenoki lisem manung asüba kitem asütsü. Joko, linük ajunga Hindu lima akümtsü meranger asünungji, Khristan-tem anemabo India tesem aika nung tashiyim inyakba angur. Iba ama mapang nung asenokbo hon aser chuba menden dang nungibo Yisu-ang shimdi ta asüba tangatetba nung tamang akangshir inyaktsü nüngdaker.