Pandya aser Rahul na asaya nungi nokdanger aliba agin

New Delhi, Aenjeti/January 24 (Agencies): India nunger cricket asayar Hardik Pandya aser KL Rahul na hopta ana tejakdang asaya nungi anentsür aliba Brehostibarnü Committee of Administrators (CoA)-i aginogo. TV show ka nung tenati tetsür anema jembiba dak ajemdaker tena asaya nungi anenja liasü.
CoA puri P S Narsimha den ashishitepba sülen iba telemtetba ya agiogo. Iba ken o bentettsü asoshi Suprem Court-i ombudsman ka shimtsütsü, koba SC-i February 5 nü latettsür lir.
“Temalen shisema aliba ken o aser telemtetba ya Amicus Curiae, P.S. Narasimha den ashishitepba sülen agiogo. Iba dak sendakba nung BCCI Ombudsman meshimtsü ken o bangdaka aliba mapang ka nung suspension orders dated 11.01.2019 tangsa tang agintsü,” ta CoA telemtetba ka BCCI-i sangdonga liasü.
Tenokdangba agintsüba sülen Pandya New Zealand nung team den tanaben adentsü imlar aser Rahul domestic circuit mesera England den tang tasayadak series nung India A den adentsü akok.
Diana Edulji-i cricket asayar ana ken o asadangba nung BCCI ketdangpurtem dendaktsünüa liasü saka CoA tekolakba Vinod Rai-i ya aija ashiba agi, iba ajanga Board constitution nung aibelentsü.
CoA-i ashiba agi, asayar ana asaya nungi anentsütsü asoshi telemtetba ya “BCCI Constitution Rule 46” dak ajemdaker agi.
Asayar ana ya maneni asayadaktsütsü asoshi tebilemdangba ya BCCI acting president CK Khanna-i mezüng benok shibai ken o asadangba mapang nung tena asayadakja atatsü shidang.