Osaka aser Kvitova na final asayatsü;Nadal final-i iogo

Aenjeti/January 24, 2019 (Agencies): Brehostibarnü Australia Open tetsür kija semifinal asaya nung seed pezübuba nung alila Naomi Osaka-i Karolina Pliskova madak takok ngua Czech tsür Petra Kvitova den final asayatsü jangjaogo.
Arishi küm 21 tain Japan tsürla yagi 6-2, 4-6, 6-4 agi Pliskova madak takok ngua Grand Slam anabuba atonga final tongtetogo.
“Iba asaya kanga toktepa asayatsü ni imlaa liasü,” ta Pliskova-i set ka mokoki aliba nungi tanaben meyipa arua asayatsü imlaba indang Osaka-i ashi.
“Ni set tasembuba nung asendenshir, kechi atalokdir atalokaka ni akokba tashi meranga asayatsü mulungtet aser ni kokogo,” ta lai ashi
Serena Williams-i 2015 küm US aser Australian Opens atonga akokba sülen Osaka-i iba asayamung ana ya atonga akoktsü aoshi meranga asayadar.
Final asaya nung lai Kvitova kokra lai Romania tsür Simona Halep ajateta world number one akümtsü.
Brehostibarnü tetsür kija asaya semifinal tanga ka nung Czech tsür Petra Kvitova-i America tsür Danielle Collins koka tang mezüngbuba Australian Open final tongtetogo.
Wimbledon anaben tashi koker alila Kvitova-i 7-6 (7/2), 6-0 agi Collins madak takok angu.
Rod Laver Arena nung mezüngbuba set asaya kanga tsüka akümba ajanga kilem meshibang tashibo Collins aser Kvitova na kanga toktepa asayaa liasü.
Kvitova-i ashiba agi, kilem meshibang tashibo la kanga kangshia liasü.
“Tanabuba set tie break asayaba mapang kanga junga asayatetba atema ni kanga pelar. Kilem shibangba mapang nung fan tem dang nungi kanga agi tepelaba liasü. Ni kilong nung asayaner aser iba ajanga kü nem terabo teyari agütsü ama bilemer,” ta Kvitova-i ashi.
Kasa asayamung tebur kija semifinal asaya nung Rafael Nadal-i 6-2, 6-4, 6-0 agi Stefanos Tsitsipas madak takok ngua final tongtetogo.
Greek nunger asayar Tsitsipas-i taküm iba asayamung nung tamamangtsüka asayateta Roger Federer dena tsükdaktsüogo saka pa asoshi Nadal kanga tashi tait asü.
Spain nunger asayar yagi game 63 tashi pa indang serve ka danga drop mesüi asayadar aser final tashi asayaa aruba mapang set ka danga tamakok ngua mali. Pa final nung Novak Djokovic mesera Lucas Pouille den asayatsü.
“Ni anogo shia kanga junga asayar ama bilemer. Ita aika masayaai arur idaki aliba nüburtemi kü nem tashi balaka agütsür,” ta pai ashi.
Nadal-i tang agi pongubenbuba Australian Open final tongtetogo aser Open era nung Grand Slam pezüprongla anaben tashi koktetba asayar mezüngbuba asayar akümtsü imlaa asayadar.