57buba SASA asayamung tenzükogo

Er. Zale Neikha-i 57buba SASA meet’s wako salatsüba noksa nung angur.

Kohima, Aenjeti/January 24 (TYO): Southern Angami Sports Association (SASA) 57buba games & sports meet Kigwema nung tenzükogo. Asayamung lapokba sentong nung Youth Resources & Sports advisor Er. Zale Neikha tetushi tesemdanger asü.
SAPO kübok yimtsüng 12 nungi asayartem football (tebur) aser volleyball (tetsür aser tebur) asaya nung shilem agidar.
Asayamung lapokba sentong nung o jembidang Er. Neikha-i lanurtem dang saisapong ya profession ka ama agitsü ajungshi.
Pai ashiba agi, state sorkari state nung saisapong ajungkettsü asoshi bendanga agüja inyakdar. Indira Gandhi Stadium Kohima nung astro turf football pitch yangluba ateshia pai, state nung tangbo world class sports facility tem lir ta ashiba den football asayartem dang iba facility ya takok tashi amshitsü ajungshi.
Er. Neikha-isa, lanurtem dang saisapong nung temaba jenjang tongteta asayatsü asoshi asayatemi pei jangraba aser pei dak sempet aliba apir asaya shimtsü ajungshi.
Sentong nung SASA wrestling secretary Keneilel Rote lenisüba kübok asayamung nung shilem agiba team tem tenangzüktepba agi. 57buba asayamung atema senpet sponsor asürtem rongnung Ura Hotel, Kohima, Campsite Yedikha, Jakhama, Star Sports Kohima, Hornbill Gas Station, Phesama aser Vineits Bakery, Kigwema dena lir. Match patrons temji Seyievile Peter Zashumo, PS to NLA Speaker, Khovi Thapru BDO, Jakhama, Vilekho Bio General Secretary ASA aser Vitsorel Lcho, advocate asütsü.
Asayamung lapokba sentong ya Medo Keyie lenisüba kübok aka aser SASA tir Ruokuovikho Chale-i lokti pelaa agizükba o jembi.
Angami Sport Association ketdangsertem densema frontal Organisation tem ajak iba sentong nung dena liasü, ta SASA general secretary Meyiesul Thapru aser SASA games and sports secretary Neilekho Zutso nati sangdong ka ajanga metetdaktsü.
Iba asayamung ya January 25 nü tembangtsü aser asayamung shibangba sentong nung Southern Angami Public Organization tir Vimezhol Theyo tetushi tesemdanger asütsü, koba 2:00 ako nungi tenzüktsü, ta kasa sangdong ajanga metetdaktsü