St. Peter School, Toulazouma nung National Girl Child Day among

Dimapur, January 24 (TYO): January 24, 2019 nü India linüki National Girl Child Day amongba anogomong nung CHILDLINE Dimapur-ia St. Peter School, Toulazouma nung National Girl Child Day anogomong ayongzüka mongogo, ta osang ka ajanga metetdaktsü.
Loktiliba nung tetsürtem jenjang ajungkettsütsü aser libaliro jenjang tajungba kümdaktsütsü nükjidong nung iba sentong ayonga agi, kechiyong tetsür aika nem parnok temeden magutsür.
Iba sentong nung kaketshirtem dang loktiliba nung tetsürtemi ajangshiba timtem balala indoktsü ajungshi.
CHILDLINE Dimapur nungi team-i “My Body Safety Rules”- Good Touch & Bad Touch aser “Menstrual Hygiene Management” onüktem nung jembia liasü.
“Nü mang ji nü meyong aser shingaia na yirutsütsü makok. Nü miim osettemji telung süoshi agi nembanga lir; iba nungji kongshitsü, iba indangji jembitsü mesüra reprangtsü atema shinga dak-a temeden mali. Na mangsa noksa tangoktsü mesüra video tangoktsü, mesüra tangar mangsa noksa aser video sayutsü tangar dak temeden mali,” ta parnoki metetdaktsü.
“Na koda masütsüsa tangari kongshiba yimyatemji ‘tamajungyimi’ kongshiba lir, aser tangari nü dak kongshidang na koda mesüi kümdaktsüba yimyatemji nai odiodia ashitsüla. Nisung kari item ozüngji alema inyakra nai melung lemtetba nisung kar dang jet ta shiang, mesüra nai CHILDLINE number 1098 nung call asutsü akok,” ta parnoki metetdaktsü.
“Tetsür ita shilem aoba hygiene ji tetsür ajak atema kanga tongtibang. Ibaji alimar yimya, ajisüaka nisung karibo tesempatsü mesüra memerük ama züngshir. Iba atemaji na maaktsüla,” ta parnokisa metetdaktsü.
Iba dak alia team-i Sanitary Pads amshiba yimya sayuba sülen kaketshirtem nem lema agutsü.