NNPGs-i telok toktsür aoba indang tebilemtsü lemsateper

Dimapur, January 24 (TYO): Naga nungertemi New Delhi nung NNPGs aser India sorkar tsüngda yimjung olemtep agiba nung temulung agüja reprangba mapang ka nung, asen kidang Khango-i aniba NSCN (K) den NNPG lennirtem, kin hohotem aser GBs-i yimten telok balala nung züngsemtemi menden temaba arshia telok ka toktsür tanga ka nung oa adenba maparen azüoktsü nüngdak, ta WC, NNPGs-i metetdaktsü.
Telok toktsür aoertem asoshi seniority mesüra Naga National service nung shilem agiba indang kecha malitsü kechiyong parnoki telok toktsüba anogo nung parnok tenüng service record nungi agientsü, kechiyong iba ya ozüng alema inyakba mapa lir ta Media Cell sangdong ka nung ashi.
Kin, hohotem, kidong aser kibongtemi yimten telok balala nung züngsema alirtem dang telok ka toktsür tanga nung oa adenba mapa meinyaktsü atema tesayuba agütsütsüla. Naga nungertem mulungba ama yimten latetdaktsünür saka telok toktsür aoertemi Naga nunger telongjem tashi mait kümdaktsür. Item nisungtem ya NNPGs sasep nung mesüra tangalen takokertem ama ama pelaa magizüktsüla, ta parnokisa metetdaktsü.
NNPG lennirtem, kin hohotem aser GBs-i item nisungtem maitsü jangjatsüla aser Naga Political maparen nungi züngdoktsüla, ta WC, NNPGs-isa ashi.