Naga Hoho-i CAB magizüker; NSF posema nungiter

Dimapur, January 24 (TYO): Citizenship Amendment Bill (CAB) 2016 benokba sülen nungi Naga Hoho-i tebilemtsü abenba ola adoka arur. Centre nung BJP-i aniba NDA sorkari Bill junga meshisadangi Lok Sabha nung bill agizükogo aser iba ya North East state tem nung aliba lisopurtem anema lir aser magizüker, ta Naga Hoho-i metetdaktsü.
Iba nung ajemdaker, NSF-i January 26 Indian Republic Day mokdangtsü lemtetba nung Naga Hoho-ia posema nungiter. Asenok tejashi sayutsü atema mapa tajungtiba iba ya asütsü, ta Communication Cell, Naga Hoho-i ashi.
NDA sorkari Northeast nung lisopurtem indang taginüba aser ola mangar aser alar ama yuner, ta Naga Hoho-isa shisem.
Nagaland ya Assam den talangka mepila lir aser iba atema tebilemtsü abener, kechiyong Assam nung India senso masürtem ta jangjateta aliba nisung lakh 40-i Assam toktsür Nagaland nung arua jenoktsü akok aser iba nung lendong keta lir. January 21, 2019 nü Amit Shah-i Kolkata nung CAB agizükba sülen Bengali refugee ajak nem India senso agütsütsü ta asüba ya Nagaland atema tebilemtsü lir, ta parnokisa metetdaktsü.
Nagaland nung PDA sorkari CAB atema süoki ia mebilemba ya temenünütsüka lir. State sorkari Bengal Eastern Regulation Act of 1873 den CAB sendaktepba ya mashi memetetba mesüra yimtenren tsütsü langka ka ajangzüktsü atema inyakba mapa ka lir.
PDA sorkarisa CAB ajanga Arrla 371(A) alema meinyaktettsü ta ashir süra, Rajya Sabha nung iba CAB magizükdang Nagaland state legislative Assembly indang special session ka agia CAB anema telemtetba ka agitsüla.
NDPP aser BJP dak alia PDA nung adenba teloktem- JD(U), Independent aser NPP-ia Naga nunger dang parnok tebilemba yimjak nung metetdaktsütsü tim,
Lisopurtem anema yangluba Citizenship Amendment Bill atema tebilemtsü bena noktakba telok ajak den Naga Hoho-a adener aser posema nungiter, ta Communication Cell-isa metetdaktsü.