Tsüngremi lokti lennitsü tanishir shimtetba aser ajaba

~ L. Kika Pongener.

Tsüngremi putu mapang balala nung lokti lennitsü asoshi tanishir shimtetba aser ajaba laishiba nung angur. Nisung karbo lenir asütsü sempet tajung, ken o tetangshi, shisa taka, tashitemetet kar sernung meshimer. Ano karbo pai/lai memulungi tatemtsü o aika shiaka odang kangshia shimer. Israel nunger Ijip lima alar tia nungi anitettsü asoshi Mosa tanishir asütsü shim (Anitet-3:7-10). Saka Mosai memulung, “Kibuba nibo teyokma, kechiaser ni o nung tsüngro masong aser ni o jembitsü temeli mekiki” (Anitet-4:10). Mosa tedi Aron o junga jembiteter, saka Tsüngremi pa-bo Mosa asoshi o tongdar teyarir ka dang asütsü shim (Anitet-4:14-16). Nisung karbo nubor-i aginuba masü, pei sasa nubo yima, (Convassing) jajar tanishir akümer. Aser ano karbo tashiyim agi tangar atsüngdoker (Impeached) tanishir akümba-a alitsü. Ajisuaka, tashiyim agi peisasa tanishir akümba, ajibo alima aser nubor tsüngdanga tobur majung aser Tsüngrem tsüngdanga khuret asütsü. Ano karbo nubori-bo kanga tenuk sunga aginur sernung, saka Tsüngremi memulungba-a alitsü akok. Israel yimli nung Saul chuba melena chuba ka shimtsü bushiba mapang, Jesse-er jabaso ti rongnung aso tulu, tobur tajung aser tashi tait ajunga melentepa sayu, saka parnok ajakji Tsüngrem-i shimtetbaji masü. Anungji Samuel ainkar-i ano tanga lir mali ta asüngdang, idangji tanübusang arem nung san nuka lir ta langzü. Anungji Samuel-i paji anir arung ta ashi aser Dawid anir aru.
Atangji-jila pa-jiang Israel madak chuba asütsü Tsüngremi mulunga shimtetbaji liasü. Asen mimchir-ibo aso tulu, tobur tajung aser tashi-tait nisung dak dang rangloker, saka Tsüngremi-bo temulungjang dang repranger. Dawid chuba tendak kenu par sepoy o par jabaso Absalom’er sepoy na tsüngda rara liasü, aser iba anogo nung Absalom tepset, aser iba osangji Dawid tang ashitsü asoshi Yoab-i par sepoy Küsh nunger ka yoktsü shimtet, saka Ahimaz kasa sepoy ka, pai orr Dawid tang osangji shidi ta pa sasa meshizük, saka Yoab-i memulong. Aser Yoab-i Küsh nungbaji Dawid dangi osang bener yok, saka Ahimaz-a pa sasa odang ao. Aser pai Küsh nungbaji ajateter Dawid chuba tonga ao. Ahimaz tongli-i Dawid-i asüngdang, Asangur Absalom junga lir ma ? Saka pai langzü, “Yoab-i kodang ni yok, ni rongrongshishi tuluka angu, saka kechi’ar ni memetet”. Anungji iba osang jagi Dawid mulung masü. Iba sulen Küsh nungba (Shitakba Yoab-i yokba) sepoy-ji tonga aru, aser Dawid-i pa danga kasaji asüngdang, aser Küsh nungba-i langzü, “Kü kibur tsükchirtem aser na anema apusor ajak iba asangurji mesuka suangma”. Tetezü…Tongpang takok nguogo aser Absalom tepsetogo” ta indang-indanga langzü. Ahimaz-i kechi atalok ajak meteter ao, saka Absalom asüba osang Dawid tang ashitsü tejak marem aser numa metangtet (2 Samuel-18:19-32).
Tanü putu nunga tanishir karbo pa/la mapa agi nubor-ibo mulung masür sernung, peisasa asüküma mezümeküma ulua bilemba karbo lir, item ama tanishir jagi konang nungsang-bo aginutsü, saka nungsen-bo maremtsü aser ken o tasak arudangbo tasü-ita ochi o bendang magütsüteter aser takar-tulur nuken tsübuba tasümait, sepoy Ahimaz amaji karbo lir. Yisu alima nung alidang kenu nisung kati, ” Kibuba nia ne sulen anidakdi ta asüngdang, saka Yisui pa dang kanga junger arung ta mashi… ashiko Yisui iba nisungji pa sulen anidaktsü metemsu-i ajitet sudi. Iba sulen tangar ka tang Yisui kü sulen anitakang ta ashi, saka nisungba jagi ni tamasa orr kübu aremtsü mela-ang ta ashi. Saka Yisui ashi, tasürtemi parnok tasürtem aremtsü tokjang, saka nabo arung kü sulen anitakang ta kangshia aja, ashiko Yisu-i iba nisungjibo pa sulen anidaktsü tetemsu ta ajitet sudi. Ano tangar kati-a Yisu tang “Ni ne sulen anidakdi, saka tamasa kü kinunger-tem dang tepila o shidi”… ta ashi.
Saka Yisui ashi, “Shibaisa pei ket alu alaba nung soitter tesulen shia repranger, pa Tsüngrem yimli asoshi metemsu” (Luk-9:57-62). Arogo nung lennir kati arogo tenzükba mapa nung sotaker, yimten nung amouka shilem agira, mesura Yimsusur kati yimten bangdak ozüng ammer, arogo nung amuoka tashi amshira, telok anaprong nung mepet-mesu adokdaktsütsü. Atangji yimten-i arogo inyakyim nung amuoka tashi mamshitsüla aser Arogo-ia yimten yimsusuba bangdak inyakyim nung amuoka tashi mamshitsüla, kechiaser anaji khenyongi balala lir. “Shinga-ia kibur ana metenzüktet, kechiaser pai ka meimtsü aser ka sempatsü” (Mathi-6:24). Mosa Sinai tenemi ozüng lungpak abeni atuba menua malu, idangji Israel-purtemi tedi Aron dang sungyanglu külemtsü meshi. Aron-i lokti tulu mesoitteti Nashi chanu ka mulur aji külemdaktsü (Anitet-32:1-6). Lokti nung lennir aikati Aron-i inyakba ama lokti teimba (Majority) dak rangloker telok tsübuba agi aibelena telemtetba tai agir, aser ibajagi Tsüngrem jashidaktsür aser lokti nunga telemsa adokdaktsür. Lokti nung tanishir ajaki angatettsüba tongtipang kaji ‘Onok’ dang mesura ‘Parnok’ dang agitsü mesura shimtsü ta asüba yagi lokti ka tashi-ita anir maotsü. Tanü ama tashitemetet putu ka nung lokti ka anitsü atema “Koba mapa atema nisung shiba tapet aser tetemsu” (Right person for the right job)… ta tangatetba nung inyakra, alima aser nubor asoshi tajangzük asütsü. Lokti lennir ajungai angatetsüba kaji nia denogo, mesura nia nokdaker shilem agiogo ta asüba dang nungibo, ni adenba aser ni shilem agiba agi nubor tajangzük angur asü mangur ? ta asübaji-ang kanga agi tongtipangba lir. Tanishir kati lokti nung tenzükba agi ni kechi tajangzük angutsü ta masü, saka ni lokti nung tenzükba ajanga ozü lokti nem ni kechi tajangzük agütsütsü ta dang asütsüla. Tanü asen lima yimten, arogo, loktiliba ajungai iba ama tanishir-ji nungdaker.