Horti Director Dr Elithung-i M K Nursery semzüktsüogo

Kohima, January 25 (TYO): Tanü Dimapur lenmang nung bypass junction anasa Liezocha Dzudza yimdak Horticulture Department Director, Dr. R. Elithung Lotha-i M. K. Nursery semzüktsüogo, ta ketdangsertem osang ka ajanga metetdaktsü.
Nursery kiburtem- Khrielievi Chüsi aser Mele Nakhro na tenüngsanga Dr. Lotha-i, state tashiji horticulture lir, kechiyong state nung tsüngsang-mopung aser aliji ornamental aser mozü aketba toutem dena tsünütsü aika asoshi tapet, ta ashi.
Horti department-i horticulture terenlok atema kanga nendaka inyaker, ta shia pai horticulture ajungkettsütsü atema tejangrar entrepreneurs nem technology teyari agutsütsü, ta metetdaktsü.
Iba sentong nung Dr Lotha den Deputy Director, Jerry Patton dena liasü.
“Nagaland atema aluyimba ya kanga tongtibang aser nisung aikati horticulture sector nung masü saka tzük lu ayimba nung ang rangloker inyaker, ajisüaka horti products indang awareness agutsütsü atema onoki nursery ya tenzüktsü apitet,” ta Khrielievi Chusi-i ashi.
“State nung horticulture terenlok atema maongka tulu lir, ajisüaka asen nüburtemi ibaji memetet,” ta pai ashi.
“Iba project ya awareness agutsütsü aser lanurtem ajungmesotsü, iba denji külemi naro ayokba nung yimer den yariteptsü aser parnok dang mapang shidak nung metsüh atemtsü atema tesayuba agutsütsü asoshi tenzük. Alima tesem balala nung tsünubatemji asen lima nunga fertilizer mesüra technology mamshii tsünütettsü,” ta paisa shisem.