Pranab, Deshmukh aser Dr. Bhupen nunger nem Bharat Ratna agütsü

New Delhi, January 25 (Agencies): 70 buba Republic Day amungtsü anogo ka lia, taoba President Pranab Mukherjee, social activist asür Nanaji Deshmukh aser kentener asür Dr. Bhupen Hazarika nunger nem Bharat Ratna agütsüogo.
Deshmukh aser Dr. Hazarika na alima nung meliaka tena nem linük nung civilian honour tematiba agütsü.
“President-i kanga dang pelaseta Nanaji Deshmukh (posthumously), Dr Bhupen Hazarika (posthumously) aser Pranab Mukherjee nunger nem Bharat Ratna agütsür” ta Rashtrapati Bhavan sangdong ka nung ashi.
Dr Bhupen Hazarika ya Assam nunger liasü aser tanü Prime Minister Narendra Modi-i Twitter nung kentener, ken zülur aser film yanglur asür Bhupenda nem tenüngsang agütsü.
“Bhupen Hazarika-i mejemba aser atenba kentem ya nisungtemi kanga sapua angateper. Pai atenba kentem ajanga yimjung aser telongjem indang osang prokshir aser alima nung India kentenbaren tali nüngtugu kümdaktsü. Bhupen Da nem Bharat Ratna agütsüba atema kanga pelar” ta Modi-i ashi.
Assamese nunger Bhupen Hazarika ya November 5, 2011 nü asü. Pai Assamese dak alia Bengali, Hindi aser Oriya oshitem nung ken aten.
Küm 72 tashi asür Hazarika-i Indian film industry nung shilem agia aru aser paisa Assamese film tem- Era Bator Sur (1956), Mahut Bandhu Re (1958), Mon-Prajapati (1979) aser Swikarokti (1986) direct asü.
Bharat Ratna ya linük nung civilian award tematiba lir aser 1954 küm nungi iba sempet agütsütsü tenzük. Bharat Ratna agütsütsü junger ta asüba ya Prime Minister-i President dangi abener aser küm ka nung teimba agia nisung 3 nem dang agütsür.