KDCC-i CAB atema tebilemtsü abener

Dimapur, January 25 (TYO): Kohima District Congress Committee (KDCC)-i tebilemtsü abenba political party ka ama Lok Sabha nung Citizenship (Amendment) Bill (CAB) 2016 agizükba anema ola adoker ta metetdaktsü.
KDCC atema taküm mezüngbuba executive senden January 23, 2019 nü amendang ashishitep aketba Citizenship (Amendment) Bill 2016 ajanga Naga nunger asoshi timtem bentsür arutsü aliba tebilemtsütem benoka olemtep.
Iba Bill ajanga North East nung aliba lisopurtem aser Naga nunger asoshi lendong tulu bentsür arutsü. CAB 2016 aser Inner Line Permit tsüngda tesentaktep kecha mali aser senso temeten meliaka asen state-i nisung aika ozüng alema aruba asenoki angur. Parliament nung CAB 2016 agizüka ozüng kümra, ozüng alema arurtem asoshi lenmang lapoktsüba dang masü saka lisopurtem indang temetentem ajembangtsü maongka angutsü, ta KDCC Press Secretary, Yangertemjen-i sangdong ka nung ashi.
Iba ama bill ka agizüka ozüng kümra, Naga nunger ket nungi temeten agientsü aser tarutsü putui takoksa tulu ajurutsü. Iba tangatetba nung ajemdaker onoki Naga civil society tem posema CAB 2016 magizüker aser Nagaland sorkar dang Naga nungeri ola asokba angashitsü atema mepishir, ta KDCC-isa metetdaktsü.