National Voters’ Day nü pei temeten yoka machitsü ayongzük

January 25, 2019 nü Hotel Japfu, Kohima nung 9 buba National Voters’ Day amungdang Addl. Chief Secretary & Development Commissioner, Nagaland Sentiyanger Imchen, IAS den tetoktepba balala nung takok angurtem agiba noksa angur. 

Kohima, January 25 (TYO): Hokobarnü Nagaland nung 9 buba National Voters’ Day amungdang vote agütsütsü temsüa alirtem tenüng züluoktsü aser electoral roll nung tenüng talila züluoka aliba agientsü indang tayongzükba agütsü.
Chief Electoral Officer (CEO) Nagaland ketdangsüba kübok Nagaland kübok tesem balala nung “No Voter to be Left Behind” omen nung ajemdaker iba anogo amung aser sentong tongtibaji Hotel Japfu, Kohima nung agi.
Nagaland nung tenüng tasen züluokertem dena vote agütsürtem aser matamabensar ajaki sen mesüra tamangba yimsü atema masü saka pei tangatetba agi vote agüjang ta Additional Chief Secretary & Development Commissioner, Nagaland, Sentiyanger Imchen, IAS-i ayongzük.
Election Commission-i vote agütsütsü temsüa alirtem electoral roll nung züluoktsü atema kanga meranga mapa inyaker. Parnokisa matamabensari pei temeten mapa inyaktettsü atema nüngdakba mapatem inyaktsür, ta Sentiyanger-i ashi.
Election Commission, Booth Level Officers aser administration-i chichiba vote agütsürtem tenüng meindoktsüla saka proxy voters, booth capturing aser polling booths nung ozüng alema mapa inyakbatem mita reprangtsüla, ta paisa shisem.
Additional Chief Secretary Sentiyanger-isa tesenteper nem National Voters’ Day tezüngzüktep agidaktsü.
Sentong nung CEO Nagaland, Abhijit Sinha, IAS-i Voters’ Day indang osang metetdaktsüdang “January 25, 1950 nü asen linük nung election mezüng agiba bilemteta 2011 küm mezüng atema Voters’ Day amung” ta ashi.
Voters’ Day ya Election Commissioner indang Foundation Day lir kechiyong iba anogo nung Commission-i lanur voter tem aser kaketshirtem dang osang prokshi, ta paisa shisem.
YouthNet Chair, Hekani Jakhalu-ia “My vision for a Clean Election” onük jembidang Nagaland state indang election system nung ochimashi aser sen yong vote alizükba maparen indang ashi.
Ochimashi maliba aser election nung tim masüba loktiliba ka nung lanurtem anitettsüla. Asenoki lanurtem dang electoral system ajunga indang temetettsütem sayutsüla aser tebilemtsü abenba lennirtem nem vote agütsütsü indang ashitsüla. Iba amaji inyak nun dang asen tarutsü putu tajung asütsü, ta Hekani Jakhalu-i ashi.
“Nagaland nung clean election, ochimashi mapa maliba election aser senso shia dangi clean election osang sangoktsütsübaji kü indang mangdang lir. Asenoki asen vote, asen temeten aser asen tarutsü yoka mechili” ta laisa ayongzük.
Sentong nungsa Kohima District Election Icon, Thejakhrienuo Nakhro-i “Role of Youth in Clean Election” indang onük jembidang, nütsüng yongsük tesadang arishi küm 25 teküpok aliba linük nung lanurtem dak tashi lir ta ashi.
Tanü National Voters’ Day sentong nungsa Chief Election Commissioner, Sunil Arora nungi osang aruba zünga metetdaktsü aser clean election indang mob videos den Election Commission of India ajanga yangluba film tatsütem sayu.
Sentong nung tsünglanglen agüja alir nem sempettem agütsü;
i) Recognition of rendering commendable services during the conduct of State’s General Election and Lok Sabha Bye-election 2018 – Limasunep, IPS Commissioner of Police Dimapur and Hiazu Meru, NCS, Deputy Secretary Finance.
ii) Winner of Best Campus Ambassador in the field of Systematic Voter’s Education & Electoral Participation (SVEEP) campaign: Lenke Phom from Yingli College Longleng and Namwang Heili Liegise from Peren government College.
iii) Best State Level BLO: Bendangwati from 49 Tamlu A/C, Tamlu Hq B Polling Station.