Lionel Messi-i anir Emiliano Sala bushitsü ajungshir

Aenjeti/January 25, 2019 (Agencies): Samar aliba Cardiff City striker Emiliano Sala aser pilot David Ibbotson na maneni bushitsü asoshi football asayartemi ajungshiba rongnung Lionel Messi-a densemogo.
Argentina nunger football asayar arishi küm 28 tain, Sala mena aliba tayimtsü ya Tentonü Guernsey anasa sama aser English Channel nung anogo asem bushir Yangpetnü anen.
Pa taoba mapang asayaba club, Nantes-i social media nung, “Iba bushiba ya manentsüla,” ta post süja liasü.
Barcelona forward Messi-ia “Teimla tilaba küma oaka takoktsü lir, bushiba tanen ta onoki asüngdanger,” ta ashi.
Instagram nung zülutsüba nung Argentina nungbai, “Kü tashi ajunga agi par kinunger aser medemer nungiter,” ta shisem.
Külem asayartem rongnung Manchester City nungi Argentina forward, Sergio Aguero-ia social media hashtag #NoDejenDeBuscar (bushiba tanen) amshi.
Tentonü nikongdang Channel Island of Alderney anasa Piper PA-46 Malibu ya radar nungi samaba sülen ketdangsertemi ali aser tzüyim square mile 1,700 shi nung bushia liasü.
Sala ya Küptoknü Cardiff nung otsü tasen yanglua sen million £15 agi alizük aser pa ya Nantes nung aliba Ligue 1 club par metemertem dang tatem salem shir Welsh yimtibai meyipa arudang sama.
Guernsey harbourmaster Capt David Barker-i iba tayimtsü bushiba anentsü asoshi telemtetba agiba ya kanga tasak liasü, ta ashi saka taküm ngutettsü teimla kangabo mali, ta shisem.
Air Accident Investigation Branch ajanga iba tayimtsü indang ajunga bushisüngdanger, ta Rogonü osang sangdonga lir.
Sala teyi Romina ya Cardiff-i osangbener senden ka nung jembitsü asoshi Yangtepnü ao, kong lai ketdangsertem dang, “Imlibilema, imlibilema, imlibilema bushiba tanen. Nenoki merangba onoki angateter saka imlibilema maneni bushiang,” ta ashi.
Sala maneni bushitsü asoshi Argentina nungi football asayartemi ajungshir.
Fan temi Sala indang club, Cardiff, Nantes aser Argentina nung aliba San Martin de Progreso nung akhum agüja naro yutsür.
Sala bushiba anentsü ta osang angashia temulung raksar aser jashir, ta Cardiff City-ia sangdong ka nung shiogo.