Leonardo Jardim-i Monaco coach mapa tanaben benzükogo

Aenjeti/January 26, 2019 (Agencies): Ita asem tejakdang Leonardo Jardim Monaco coach mapa nungi anentsüba sülen pasa tanaben shimba osang Monaco puri metetdaktsüogo.
Jardim-i Thierry Henry melentsü shiba, Brehostibarnü suspend sütsü aser Hokolbarnü mapa nungi anenja liasü. Monaco puri tang tashi nung point 15 dang nguteta French top division nung ponglanglen nungi tanabuba jenjang nung lir.
Portugugal nunger coach Jardim-i 2021 June tashi tenangzüktepba tasen ka yangluogo aser pai Brehostibarnü Guingamp den asaya nungi tenzüka coach mapa abentsü.
Monaco chief executive Vadim Vasilyev-i ashiba agi, taoba küm October ita Rennes 2-1 agi makokba sülen Jardim mapa nungi anentsüba ya aibelen ka liasü.
“Tanü onoki Leonardo Jardim club mapa nungi anentsüba aibelen angatetogo. Leonardo nem pa mapa nung maneni inyaktsü asoshi maongka agütsütsü asü,” ta Vasilyev-i ashi.
Jardim, Monaco nung 2014 küm aden aser pa lenisüba kübok parnok küm 17 tsüngda 2017 küm mezüngbuba first Ligue 1 title bena liasü aser iba kümsa parnoki Champions League semi-finals tonga asayatet.
“Ozü club tang mepetmesü tia ka nung lir aser iba ji kü khuret ta ni angizüker,” ta Vasilyev-isa ashi.
“Summer transfer window mapang onoki tongtibang asayar aika ayok aser sen aika indoka asayar aliaka item asayar tem melenba nung aibelenogo. Iba ajanga onoki team tajung ka meyanglutet. Leonardo Jardim mapa nungi anentsütsü asoshi telemtetba agiba yaa aibelen ka liasü,” ta paisa ashi.
Taoba Arsenal aser France striker Henry-i taoba küm October ita coach mapa belenzükba sülen parnoki asaya ana dang koka lir.
“Ni melena shimeri Monaco tejakleni anitsü imlar aser tarutsü nung takok nguyonga aotsü imlaa atar,” ta Henry-i ashi.
Henry ya küm nung euro million 3.2 shi aazüka liasü aser Monaco den tenangzüktepba yangluba ano küm anaser tesadang anunga lir, anungji club kiburi pa nem compensation ama million ti agütsütsüsa akümtsü.