R-Day nü India-i Nepal nem ambulance 30 den bus 6 agutsü

Kathmandu (Nepal), January 26 (Agencies): Tanü India nunger Republic Day anogomong nung India-i Nepal linük nem ambulance 30 den bus 6 agutsüogo.
India nunger 70buba Republic Day anogomong nung tanü Nepal yimtiba, Kathmandu nung Indian Embassy premises nung Republic Day sentong agidang India ambassador to Nepal, Manjeev Singh Puri-i lokti tentet balala nem ambulance aser bus jabi lema agutsü.
Nepal nung anema-alibaren aser shisaliok jenjang ajungkettsütsü atema 1994 küm nungi tenzüka tang tashi nung India sorkari Nepal nung lokti tentet aser reju balala nem ambulance 722 aser bus 142 agutsüogo.
Ambassador Puri-isa Gorkha regiment nungi sepai kinüngertem nem sen lema agutsü aser Nepal linük tesem balala nung school aser kaketnang 53 nem kaket lema agutsü.
Tanep Puri-i India linük wako salatsü aser India Tiri Republic Day onük yokba zünga metetdakja liasü.
Puri-isa, “India sorkari Nepal azükarutsü aser pelaa alitsü atema Nepal sorkar nungittsü,” ta metetdaktsü.
Tanü iba sentong nung nisung 2000 shi aden aser parnok rongnung Indian embassy staff tem, Nepal nung aliba India nunger sensotem, Kathmandu nung India nunger shishilembartem, osangbenertem aser kaketshirtem dena liasü.