NPCC-i PDA & BJP aitsür

Dimapur, January 26 (TYO): Nagaland nung nübortemi Republic Day mokdangba ya state nung PDA sorkar aser Centre nung BJP sorkar atema maaksü ka lir, kechiyong parnoki Citizenship Amendment Bill (CAB) anema ola adokba mangashir. BJP-i kechi südir süaka CAB agizüktsü ta tekong meranga noktakba ajanga North East ajungalen tensa mesüngjemteti lir, ta Nagaland Pradesh Congress Committee (NPCC)-i ashi.
PDA sorkari Naga nunger kümzüka ayutsü atema mebilemtsür aser Cabinet-i CAB atema telemtetba agibaji tamashi mapa ka lir aser tangatetba shitak aliba PDA MLA-i CAB anema noktaka menden toktsütsüla.
CAB ya agientsüla kechiyong iba ya Nagaland ama state tila asoshi lendong lir ta NPCC-i tetenzük nungi shia arur. Iba Bill atema Assam nung AGP-i BJP den tesentaktep pilaogo, Meghalaya nung NPP-i BJP atsüngdoktsü ta amokmerener, Mizoram nung MNF-i CAB anema noktaker aser Manipur nung BJP sorkari Manipur nung CAB mamshitsü atema bangzüng ka renemogo. Ajisüaka, PDA sorkar aser BJP-i iba atema ola madokba ya nübortem mezüngmeshiba inyakyim ka lir, ta Communication Deptt, NPCC-i ashi.
Nübortemi PDA sorkar dak tamang maker aser ibaji tanü Republic Day benjung nung nisung madenba ajanga sayur. Onoki NSF aser ENSF den parnok federating units ajak den yaritepa CAB anema noktaktsü, ta NPCC-isa ashi.
Tangatetba shitak aliba senso ajaki political party nung züngsemba toktsür CAB anema noktaktsüla. BJP-i Hindutva tashitem aginüba ama iba mapa inyaker saka asenoki iba telemsa adokdaktsütsü aliba bill ya agiendaktsütsü atema longjemdi, ta parnokisa ayongzük.