ACYA SFS pur Youth Day amung

Dimapur, Aenjeti/Jan. 28 (TYO): Angami Catholic Youth Association, St. Francis de Sales (ACYA SFS) pur Aenjeti/January 27, 2019 anogo Savio KG School, Kohima nung 38Buba Youth Day munga liasü.
ACYA nisan salatsüba mapang ACYA SFS Advisor Keneilhounyii Daniel Belho-i lanurtem ajungshi aser iba anogomung salem lemsatepa liasü. Catholic Church puti otsü ya Yisu Khrista nungi tenzük anungji arogo nung tera yanga puti otsü aser tesayubatem tali angazüktsüla, ta Belho-i lanurtem dang ajungshia liasü.
Belho-isa ashiba agi, Catholic arogo mashi ka nung tamanger ajak sako dang akhum agüja amshir. Paisa lanurtem dang Catholic tesayuba tali tejangjaba nung angazüka tangertem den lemsatepba nung mapang indokang, ta ashi.
Arogo nung yakbang süa shilem agitsüji tongtibang ta advisor-i lanurtem dang shia, arogo mapa nung yariteptsü ajungshia liasü.
ACYA nung mapa balala inyakba indang athishia jembiba mapang, tetenzük nung timtem ajuruaka tatem nungbo tajung jangratemtsü asütsü aser temoatsü jenti angutsü, ta Belho-i ashi. Paisa mochitsü agütsüba ninang indang tatishitsü amshia lanurtem dang ajungshia liasü. Pai ashiba agi, mochitsü agütsüba ninang 10,00,255 timtema mile aika yima jajar tanga ninang million pezü nungi pongu ajurur mochitzü gram 400.50 yanglur.
Pai lanurtem dang temu milen kati temu milen tanga ka tsüklokba ama alitsü ajungshi aser arogo asoshi tesangwa kaka asütsü ayongzük.
Tesüiba kümtem nung Tsüngremi temoatsü balala agütsüba asoshi tenüngsang agüja minute ka mokrema liasü.
Iba sentong tenzüka ACYA SFS indang Spiritual Advisor, Rev. Richard Fernandes-i sarasadem aser Kekhriengunuo Teresa-i Lai azüng.
ACYA Gen Rosemary Kense-i annual report agütsü, Rev. Fr. Peter Pithungo-i sentong tembanga sarasadem aser Seyiekhrielie Carlus-i sentong ketdangsüa agia liasü.
Taoba mapang ACYA SFS nung executive inyaka alir Elizabeth Sorhie aser Bernadette Dziivichii nati temeja ken aten aser ACWA SFS ajanga tsüngsang ka agi telok saksalemdakja liasü.
Iba sülen ACYA SFS tir tejenba, Seyiekhrielie Carlus-i tir tasenba Paul Belho nem Constitution amokja liasü.
Kasa sentong nung kümsük 2019-20 asoshi ACYA SFS ketdangser shima liasü aser Mary Meyase nem ‘Youth of the Year Award’ agüja liasü. ACYA nungi züngsemtemi lenla balala nung takok angur nem tetushi agütsü aser iba sentong nung Mary Help of Christians Cathedral aser St. Ching Hasang Parish, Kohima nungia lanurtem arua dena liasü.